Qandli diabetni oldini olish dolzarb vazifa

“Adolat” SDP Navoiy viloyat Kengashi tomonidan viloyat Endokrinologiya dispanseri “14 noyabr xalqaro qand miqdorini oʻlchash kuni” munosabati bilan “Qandli diabet bilan ogʻrigan bemorlarni davolashning yangicha usullari” mavzusida davra suhbati boʻlib oʻtdi. Bayramona ruhda oʻtgan tadbirda partiyaning xalq deputatlari mahalliy Kengashlardagi deputatlari, partiya faollari, viloyat Endokrinologiya dispanserining shifokorlari va hamshiralari, dispanserda davolanayotgan bemorlar hamda OAV ishtirok etishdi.

Erta tongdan “14 noyabr xalqaro qand miqdorini oʻlchash kuni” munosabati bilan viloyat Endokrinologiya dispanseri binosi bayramona ruhda bezatilib, muassasada davolanayotgan fuqarolar hamda bemor bolajonlar uchun konsert dasturi namoyish etildi.

Shu kuni dispanserda “Ochiq eshiklar” kuni ham tashkil etildi. Unda xohlovchilar qandli diabet boʻyicha zarur maslahat va tashxis yordamini olish imkoniyatiga ega boʻlishdi.

Bugungi kunda dispanserda 19198 nafar endokrin kasalliklar roʻyxatga olingan. Shundan 9764 nafarini qandli diabet kasalligiga chalingan bemorlar tashkil etadi. Eng achinarlisi, kasallik qayd etilgan bemorlarning 109 nafari 18 yoshgacha boʻlgan bolalar hissasiga toʻgʻri kelmoqda. 4 qavati yangi binoda endokrinologiya dispanserida laboratoriya, dispanser maslahat, jarrohlik amaliyoti, endokrinologiya, reanimatsiya bolalar va diabetologiya boʻlimlari xizmat koʻrsatadi.

Zamonaviy tibbiy jihozlar bilan jihozlangan ushbu muassasa kasallikni oldini olish va davolash ishlarini olib borishda yanada keng imkoniyatlar yaratadi. Ushbu dispanserda bugungi kunda 220 nafar malakali shifokor va xodimlar faoliyat olib boradi, — deydi Husen Qurbonov viloyat Endokrinologiya dispanseri shifokori.  

Qandli diabet kasalligi boʻyicha 2-guruh nogironiman. Koʻp yillardan buyon ushbu dispanserda muntazam davolanaman. Bu yerda bemorlar uchun barcha sharoitlar muhayyo etilgan, buning uchun davlatimizdan minnatdorman. Ayniqsa, shifokorlarning xushmuomalaligi biz kabi bemorlarning ahvolimizni yanada yaxshilanishiga yordam bermoqda, — deydi Xatirchi tumani “Bogʻchakalon” MFYda yashovchi Oydinoy Ulugʻova.

Tadbir davomida partiyaning Navoiy viloyat Kengashi raisi, xalq deputatlari viloyat Kengashi deputati Rustam Xayitov shifoxonada davolanayotgan bemorlar holidan xabar olib, ularga yaratilgan sharoitlar bilan yaqindan tanishdi hamda partiyaning maxsus sovgʻalarini ulashdi.

“Adolat” SDP

Navoiy viloyat  Kengashi Matbuot xizmati.