“Qonun ustuvorligi – taraqqiyot garovi” mavzusida davra suhbati

Yurtimizda   jamiyatni demokratlashtirish va yangilash, dunyoning eng rivojlangan demokratik davlatlari qatoriga qoʻshish maqsadida keng koʻlamli islohotlar amalga oshirilmoqda.

Davlatimizda qonun ustuvorligi Konstitutsiya va barcha normativ huquqiy hujjatlar tomonidan oliy mezon sifatida oʻz aksini topgan.

“Oʻzbekiston -2030” strategiyasi ustuvor yoʻnalishining 4-Qonun ustuvorligini taʼminlash,xalq xizmatidagi davlat boshqaruvini tashkil etish oliy maqsad qilib belgilangan.

Bugun “Adolat”SDP Sirdaryo viloyat Kengashi tomonidan Xovos tumani “Tinchlik”MFY da joylashgan 34-oilaviy poliklinikada tibbiyot xodimlari ishtirokida “Qonun ustuvorligi – taraqqiyot garovi” mavzusida davra suhbati tashkil qilindi.

Tadbirda “Adolat”SDP Sirdaryo viloyat Kengashi raisi Jamol Komilov, viloyat Kengashi deputati Gʻoyibnazar Rayimnazarov, tuman adliya boʻlimi xodimi Qilich Murodovlar ishtirok etishdi.

Tadbirda maʼruzachilar tomonidan qonun ustuvorligi shaxsga oʻz huquq va erkinliklarini moneliksiz amalga oshirish, oʻz hayoti, erkinligi, shaʼni, qadr-qimmati va boshqa daxlsiz huquqlari qonunan kafolatlanganligi tufayli tinch, osoyishta, xotirjam, hech qanday tashqi taʼsirlardan, zoʻravonlik va oʻzboshimchalikdan qoʻrqmay yashash imkoniyatini berishi,shuningdek shaxsga uning uchun majburiy boʻlgan mazkur hujjatlarni qabul qilish jarayonida uning oʻzi yoki saylab qoʻygan vakillari orqali ishtirok etish, davlat boshqaruviga taʼsir oʻtkazish, davlat organlarining faoliyati ustidan jamoatchilik nazoratini amalga oshirish, oʻz huquq va erkinliklarini sud orqali himoya qilish, davlat organlari, mansabdor shaxslar, jamoat birlashmalarining gʻayriqonuniy xatti-harakatlari ustidan sudga shikoyat qilish huquqini taʼminlashi yuzasidan huquqiy maʼlumot berildi.

Agar jamiyatda qonun ustuvorligi taʼminlanmasa odamlarda nafaqat bugungi, balki ertangi kuniga ham ishonch yoʻqoladi, adolat, tenglik, erkinlikka rioya qilinmaydi. Qonun ustuvorligi taʼminlanmagan jamiyatda iqtisod ham rivojlanmaydi, iqtisodiy islohotlar ham samara bermaydi. Chunki hech kim qonun ishlamagan joyga oʻz mulkini, sarmoyasini kiritishni xohlamaydi.

Qonun ustuvor boʻlgan davlatda erkinlik, adolat, tenglik kafolatlanadi, hokimiyatning shaxsga taʼsiri chegaralanadi, inson huquqlari himoyalanadi, mulk huquqiga rioya qilinadi, odil sudlov mustaqil boʻlib, samarali amalga oshiriladi.

Xulosa qilib aytganda, qonun ustuvorligi jamiyatda erkinlik, adolat, tenglik kafolatlanishini, inson huquqlari himoyalanishini, mamlakat iqtisodi barqaror oʻsishi uchun tadbirkorlarda, chet ellik investorlarda mustahkam ishonchni shakllanishining mustahkam garovi boʻlib qoladi.

Zero, adolat va qonun ustuvorligini taʼminlash, xalqchil va insonparvar yangi jamiyat qurish, inson huquq va erkinliklarini, shaʼni va qadr-qimmatini taʼminlash amalga oshirayotgan islohotlarimizning asl maqsadidir.

“Adolat” SDP Sirdaryo viloyat kengashi Matbuot xizmati.