Siyosiy partiyalar va huquqiy madaniyat

     Bugungi kunda fuqarolik jamiyati va inson erkinliklarini ta’minlashda siyosiy partiyalarning ishtiroki ortib bormoqda. Bu borada har bir partiyaning o‘z yo‘li bor. Jumladan, O‘zbekiston “Adolat” SDP qonun ustuvorligini ta’minlash, fuqarolarning huquqiy madaniyatini yuksaltirishni o‘zining asosiy vazifasi deb biladi.
     Partiyaning Andijon viloyat kengashi tashabbusi bilan Andijon shahrida “Jamiyatda yuksak huquqiy madaniyatni shakllantirishda siyosiy partiyalarning o‘rni” mavzusida o‘tkazilgan davra suhbati shu xususda bo‘lib o‘tdi. Viloyat partiya kengashi raisi — Madaminjon Madazimov tadbir avvalida siyosiy partiyalar va respublikamizda amalga oshirilayotgan siyosiy islohotlar, qonun ijodkorligi va fuqarolarning huquqiy madaniyati yuksalib borayotgani to‘g‘risida gapirdi. “Adolatchilar” jamoatchilik orasiga kirib borib, yangilangan Konstitutsiyamiz asosida qonunchiligimizga kiritilayotgan o‘zgarishlarni tushuntirib borayotganini ta’kidladi.
     Shundan so‘ng huquqshunoslar va partiya faollarining jamiyat hamda huquq mavzusidagi ma’ruzalari eshitildi.
     Janona Rahimova,”Adolat” SDP Andijon shahar kengashi raisi:
- Fuqarolarning qonunlarimizni qay darajada bilishlari — qonun ustuvorligini ta’minlashda katta ahamiyatga ega. Har qanday demokratik davlatda fuqarolarning erkin fikrlash huquqi kafolatlangan bo‘lib, insonga o‘z fikr-mulohazalarini ifodalash imkoniyatini yaratib beradi. Erkin fikrlash bor joyda fikrlar xilma-xil bo‘ladi. Bugun biz ayni shu yo‘ldan boryapmiz. Bu borada ko‘ppartiyaviylik alohida o‘rin egallaydi.
     Davra suhbati qatnashchilari ta’kidlaganlaridek, siyosiy partiyalar jamiyat va davlat qurilishida muhim o‘ringa ega. Ular demokratiyaning mezoni bo‘lmish fikrlarning turfa bo‘lishini ta’minlashda katta ahamiyatga ega.

“Adolat” SDP Andijon viloyat kengashi
Matbuot xizmati.