Genderga oid statistika tahlil qilindi

Kuni kecha Oliy Majlis Senatining Xotin-qizlar va gender tenglik masalalari qo‘mitasi tomonidan hamkor tashkilotlar bilan birga 2030 yilga qadar Gender tenglikka erishish strategiyasining 2021–2022 yillar uchun mo‘ljallangan chora-tadbirlar rejasida belgilangan  bandlar ijrosi yuzasidan davra suhbati bo‘lib o‘tdi.

 Tadbirda Davlat statistika qo‘mitasi hamda Innovatsion rivojlanish vazirligining hisobotlari eshitildi. Statistika qo‘mitasi vakillari tomonidan ishga tushirilgan GENDER.STAT.UZ va SIAT.UZ   veb-saytlari taqdimoti va genderga oid statistik ma’lumotlar berib o‘tildi. 

Mazkur veb-saytlarga gender tenglik bo‘yicha qonunchilik hujjatlari va BMT tomonidan belgilangan gender ko‘rsatkichlarning minimal to‘plami hamda Davlat statistika qo‘mitasi tomonidan gender tenglikka asoslangan boshqa ko‘rsatkichlar asosida ma’lumotlar 3 tilda (o‘zbek, rus va ingliz) joylashtirilgan.

Taqdimotda 2022 yil 1 oktabr holatiga ayollar egalik qiladigan xususiy korxonalar ulushi 38 % ga, sudyalar orasida ayol sudyalar ulushi 2022 yilda 13,4 % ga, boshqaruv lavozimlarida faoliyat yuritayotgan ayollar ulushi 27,7% ga, fan doktori darajasiga ega ayollar soni 731 nafarga, fan nomzodi darajasiga ega ayollar soni 2427 nafarga, falsafa doktori darajasiga ega ayollar soni 1545 nafarga, Internetdan foydalanadigan ayollar ulushi 72,6 % ga yetgani alohida ta’kidlab o‘tildi.

“Ayollar va erkaklar statistik to‘plami” yillik davriylikda ikki tilda (o‘zbek va rus tillarida) nashr etiladi. “Ayollar va erkaklar statistik to‘plami”ni tayyorlashda 550 mingdan ortiq yuridik shaxslar tomonidan taqdim etilgan statistika hisobotlari, tanlanma kuzatuv ma’lumotlari hamda vazirlik va idoralarning idoraviy ma’lumotlaridan foydalanilgan.

Shu bilan birga, tadbir davomida Innovatsion rivojlanish vazirligi vakillari tomonidan “STEAM” yo‘nalishida tahsil olayotgan xotin-qizlarni har tomonlama qo‘llab-quvvatlash maqsadida vazirlik tomonidan bajarilgan ishlar bo‘yicha hisobotlar eshitildi.

Tadbir so‘nggida yuqorida ta’kidlab o‘tilgan statistik ma’lumotlarni chuqur tahlil qilgan holda, xotin-qizlarni ijtimoiy, iqtisodiy va siyosiy sohalardagi faolligini oshirish borasida hamkorlikda ishlash mexanizmini yaratish bo‘yicha kelishib olindi.