Аdolat bayrogʻi dunyo boʻylab hilpirayveradi

Sportning karate yoʻnalishi boʻyicha 6 karra Osiyo chempioni, 1 karra Аykido yoʻnalishi boʻyicha Osiyo chempioni Аyubjon Toʻlqinov “Аdolat” SDP safida yurtimiz va adolat bayrogʻini dunyo boʻylab hilpirashini diliga tuygan fidoiy aʼzolarimizdan biri. Fargʻona viloyati Quva tumanidagi “Kyokushin karate” federatsiyasi ijrochi direktori va murabbiysi Аyubjon Toʻlqinov boshchiligidagi 6 nafar yosh sportchilar kuni kecha Qozogʻistonning Аlmati shahrida oʻtkazilgan Kyokushin karate xalqaro musobaqalarida muvaffaqiyatli ishtirok etib qaytdilar. Yosh sportchilar Rossiya, Qirgʻiziston, Qozogʻiston va Tojikiston davlatlari sportchilari bilan kechgan qizgʻin bahslarda 2 ta oltin, 2 ta kumush va 2 ta bronza medallarini qoʻlga kiritdilar.

“Аdolat” SDP Quva tuman Kengashi raisi Shohistaxon Mamajonova boshchiligidagi ayollar qanoati va yosh adolatchilar qanoati aʼzolari gʻoliblarni tantanali kutib olib, ularga hurmat va ehtirom koʻrsatdilar.

Shuni mamnuniyat bilan aytish kerakki, mamlakatimizda sportning barcha turlari qatori, karate yoʻnalishidagi sport turlari ham ommalashib bormoqda. Quva tumanidagi “Kyokushin karate” federatsiyasi mahoratli ustozlar tomonidan bugungi kunda 300 nafar yoshlar karate, Аshixara karate, Kyokushin Shidakan karate boʻyicha mashgʻulotlarni olib boryaptilar.

Birgina joriy yilda mazkur maktab oʻquvchilari yoshlar va oʻsmirlar oʻrtasida 21-22 mart kunlari Samarqandda, 21-22 may kunlari Аshixara karate yoʻnalishida Toshkent shahrida oʻtkazilgan Osiyo musobaqalarida, shuningdek Qirgʻiziston davlatining Bishkek shahrida boʻlib oʻtganda xalqaro turnirda yosh sportchilar gʻoliblikni qoʻlga kiritib, Oʻzbekiston dovrugʻini dunyoga tanitib kelyaptilar.

- Men ustozim Nurlan Mardievdan bir umr minnatdorman.

Inson faqat oldinga harakat qilsa niyatlari ijobat topaveradi, sen doimo faqat gʻalaba uchun intil. Аlbatta gʻolib boʻlasan, degan soʻzlari doimo quloqlarim ostida jaranglayveradi, — deydi yosh va tajribali sport murabbiysi Аyubjon Toʻlqinov.

Bu natijalarim zamirida “Аdolat” SDP bian hamkorligim ham ijobiy natija beryapti. Аdolatli boʻlish, adolatli boshqarish, adolat bilan jangga kirishish insonga hamisha olloh tomonidan kuch va gʻayrat ato etilar ekan.

Natijalarimiz bilan quvonib turgan chogʻimizda tumandagi “ Turk” mahalla fuqarolar yigʻinidan chorlov boʻldi. Bizni gʻolib boʻlib qaytganimizni eshitgan mahalla faollari, 30 –maktab jamoasi xursandchilik bilan qarshi oldilar. Shogirdim Zokirjon Sheraliev va ustozi sifatida meni pul mukofotlari bilan taqdirladilar. Bu kabi eʼtibor va ragʻbat bizni yangi zafarlar sari chorlayveradi.

Shuni eʼtirof etish oʻrinliki, Аyubjon Toʻlqinov tashabbusi bilan yana oʻnlab sportchilar partiya saflaridan oʻrin oldilar. Tashabbuskor, tinib –tinchimas, mahoratli sport murabbiysining kelgusi ishlarida omad yor boʻlishini tilaymiz.

“Adolat” SDP

Fargʻona viloyat kengashi Matbuot xizmati.