“Adolat qabulxonasi”: — Sel xavfi bartaraf etildi

"Adolat " SDP Fargʻona viloyat Kengashining “Adolat” qabulxonasiga Soʻx tumandagi Yangiariq mahalla fuqarolar yigʻini Obida koʻchasi, 7-uyda istiqomat qiluvchi Nasimaxon Mirzalievadan murojaat kelib tushdi. Murojaatda fuqaroga tegishli hovli uy tumandagi Yangi ariq kanali oqib oʻtuvchi hududda joylashgani, kanalda tozalov ishlari amalga oshirilmasa oʻzi va mahallada istiqomat qiluvchi koʻplab xonadonlar seldan jiddiy zararlanishidan xavotirini bildirib, amaliy koʻmak soʻradi.

Fuqaro murojaati Fargʻona viloyat Kengashi tashabbusi bilan viloyat Favqulodda vaziyatlar Boshqarmasi, Soʻx tumani irrigatsiya boʻlimi tomonidan oʻrganib chiqilib, sel xavfini oldini olish uchun zaruriy chora- tadbirlar belgilanadi. Mutasaddi tashkilotlar va Soʻx tumani “Adolat” SDP tuman Kengashi deputatlari Oʻtkirjon Boltaboev, Amirali Safarovlar boshchiligida Yangi ariq mahalla aholisi bilan birgalikda keng qamrovdagi xalq hashari tashkil etildi. Mutasaddilar tomonidan zarur texnikalar jalb etildi. Erta tongdan kechga qadar davom etgan hasharda “Yangi ariq” kanalining 14 km tozalov va taʼmirlash ishlari amalga oshirildi. 15 ta hovli uylarda istiqomat qiluvchi 50ga yaqin oilalar xavfsizligi yoʻlida olib borilgan ishlar oila vakillarining xursandchiliklariga sabab boʻldi.

-Soʻxliklar “Adolat” partiyasini juda hurmat qiladi, — deydi murojaatchi Nasimaxon Mirzalieva . — Oddiygina bir fuqaroning murojaati keng koʻlamdagi hasharga aylanganidan oilamiz va barcha qoʻshnilarimiz minnatdor. Ozgina yomgʻir yogʻsa, yomgʻir kuchayib, selga aylansa uyimiz suv ostida qoladi, deb yurak hovuchlar edik. Hashardan keyin Yangi ariq kanalimiz keng va ravon boʻlib qoldi. Biz partiyaning tuman va viloyat Kengashiga, Favqulodda Vaziyatlar Boshqarmasi va tuman boʻlimi rahbarlariga, barcha xodimlariga minnatdorchilik bildiramiz. Adolatga hamisha ishonamiz.

Adolatning kuchi – bir emas, oʻnlab oilalarning oʻylantirib turgan katta muammolarga yechim boʻla oldi. Bu esa har bir insonning ertangi kuniga ishonch va vatanga sadoqat ruhlarini oshirdi.

                                “Adolat” SDP

                              Fargʻona viloyat kengashi Matbuot xizmati.