Adolatli qaynonalar — ibrat maktabi

“Adolat” SDP Toyloq tuman Kengashi qoshidagi “Adolatli qaynonalar”, ”Nuroniy“ jamgʻarmasi viloyat boʻlimi, viloyat ”Buvijonlar maktabi“ jamoasi hamkorlikda Toyloq tuman ”Adolatli qaynonalar“ kengashi raisi Oʻgʻiloy Yoʻldosheva tashabbusi bilan Tayloq tumanining ”Ravot“ mahallasida joylashgan 5-umumtaʼlim maktabida boʻlishib yuqori sinf oʻquvchilari bilan ”Uch avlod uchrashuvi“ tadbiri oʻtkazdilar. Tadbirda shu maktabning sobiq oʻquvchisi, ”Partiyaning oqila ayoli“ Respublika bosqichi gʻolibi Nargiza Yunusovaning ”Hadya” nomli kitobi taqdimoti ham boʻlib oʻtdi.

Tadbir yakunida maktab kutubxonasiga kitob va jurnallar hadya qilindi. Qadimda sharq ayollari nazokatu-jozibasi, oilaga sadoqati barobarida erlar bilan yonma-yon turib roʻzgʻor tashvishlarini koʻtarganlar, farzandlar tarbiyalab ilm oʻrgatganlar. Yurt obodligi, farovonligiga munosib hissa qoʻshganlar. Shu bois, oqila va jasur ayollar barcha zamonlarda ham mehribonligi, oqilaligi barobarida mardona mehnati bilan el nazariga tushganlar. “Adolat” SDP Toyloq tuman Kengashidagi “Adolatli qaynonalar” Kengashi rahbari Oʻgʻiloy Yoʻldosheva boshchiligida Tayloq tumanining “Ravot” mahallasi, Ravot qishlogʻida istiqomat qilib kelayotgan Zaynab ona Baqoyeva holidan xabar olindi. Onaxon turmush oʻrtogʻi Subhon ota Baqoyev bilan turmush qurishib 12 nafar farzandni oq yuvib, oq tarab voyaga yetkazdi. Barchasini oliy maʼlumotli qilishdi. 70 dan ortiq nevara, 50 dan oshiq chevarayu-abiralarning sevimli buvijoni boʻlmish Zaynab ona bu yil oʻzining 97 yoshini kutib olish taraddudida. “Ulugʻ yoshni qarshi olishimga sabab men sport bilan muntazam shugʻullanib kelaman. Eshitish moslamasi ishlatmayman, koʻzoynak taqmayman xudoga shukr koʻzim ravon koʻradi, qulogʻim eshitadi” — deydi suhbatda onaxon. Albatta, “qarisi bor uyning parisi bor” — deya bejizga aytishmaydi-da. farzandlar, nevaralar, chevarayu-abiralar qurshovida boʻlayotgan Zaynab ona duoga qoʻl ochar ekan bugungi dorilamon kunlarimizga, yurtboshimizga oʻzining shukronalarini bildirdi. Onaxonga partiyaning esdalik sovgʻalari topshirildi.

Nilufar Akramova,
“Adolat” SDP Tayloq tumani Kengashi raisi.