Aholi muammolari oʻrganilmoqda

Oliy Majlis Qonunchilik palatasi deputati Dilrabo Xalboyeva oʻz saylov okrugida boʻlib fuqarolarni murojaatlari muammolari yuzasidan Yangiyoʻl tumani hokimligi binosida uchrashuv oʻtkazdi.Uchrashuvda tumanning “Navbahor” hamda “Yoʻgontepa”MFY da yashovchi fuqarolar ishtirok etishdi.

Ochiq va samimiy muloqot tarzida kechgan qabulda uy-joy, moddiy yordam, bandlik, kontrakt toʻlovi, tibbiyot, tadbirkorlik va boshqa masalalarga oid murojaatlar kelib tushdi. Qabulda koʻrib chiqilgan murojaatlardan 50 foizi shu joyning oʻzida ijobiy hal qilindi. Ayrim murojaatlarda koʻrsatilgan masalalarni hal etish yuzasidan tegishli mutasaddilarga tavsiyalar berildi. Muddat talab qiladigan murojaatlar tegishli tashkilot rahbarlari tomonidan nazoratga olinadigan boʻldi.

Qabulda taʼkidlanganidek, har bir murojaat asoslicha oʻrganib chiqiladi va qonuniy yoʻl bilan yechimini topadi. Hech bir fuqaro murojaati eʼtibordan chetda qolmasligi kerak degan shiorni oʻzlari uchun bosh gʻoya qilib olgan deputat muloqotda koʻtarilgan har bir muammo va takliflarni qunt bilan oʻrganib, qonun doirasida va imkoniyat qadar yechim topilishi haqida fikrlar bildirdi.

Ancha yillardan buyon yurak yetishmovchiligi bilan davolanib kelaman, – deydi “Yoʻgontepa”MFYda istiqomat qiluvchi fuqaro Qahramon Toʻychiyev Qahramon. Tuman poliklinikasida qayta koʻrikdan oʻtishim hamda yurak operatsiyasi uchun order olish kerakligi haqida deputatga murojaat qildim. Murojaatim shu joyni oʻzida hal boʻldi. Tuman shifoxonasida davolanadigan boʻldim. Operatsiya uchun order beriladigan boʻldi. Aniqlangan muammolarni bartaraf etish yuzasidan tegishli tashkilotlarga deputatlik soʻrovi chiqarildi.

Albatta, uzoq vaqtdan buyon hal boʻlmay kelayotgan masalalarning hammasiga birgina uchrashuv doirasida yechim topish mushkul. Muhimi, ular oʻz tashvishlarini xalq vakillariga ishonishmoqda, muammolarini yechishda ularga suyanishmoqda. Hudud aholisi bilan oʻtkazilgan uchrashuvlar davomida odamlarni qiynayotgan ijtimoiy muammolarni ijobiy hal etish boʻyicha qator amaliy ishlar davom etmoqda. Zero hech bir murojaat eʼtibordan chetda qolmaydi.

“Adolat” SDP

Toshkent viloyati Kengashi Matbuot xizmati.