Aholi salomatligi katta boyligimiz

Biz aholiga kafolatli tibbiy xizmat koʻrsatish, zamonaviy texnologiya va davolash usullarini keng joriy qilishni davom ettirish tarafdorimiz.

Bugun Kitob tumani kasaba uyushmalari qoʻmitasi tadbirgohida Prezidentlikka koʻrsatilgan nomzod Robaxon Maxmudovaning Qashqadaryo viloyatidagi ishonchli vakili Ruiddin Raupov hamda Oliy Majlis Qonunchilik palatasi deputati Maxfurat Xushvaqtova kitoblik saylovchilar bilan uchrashdilar.

“Aqlli tibbiyot” tizimini shakllantirishning huquqiy asoslarini ishlab chiqib, tibbiyot sohasiga zamonaviy axborot kommunikatsiya texnologiyalarini keng joriy etish xususida ham nomzod dasturida belgilangan yoʻnalishlar targʻib etildi. Shuningdek “Oʻzbekiston Respublikasining sogʻliqni saqlash Kodeksi” loyihasini yanada takomillashtirish, unda aholining barcha qatlamlari tibbiy yordamdan bahramand boʻlishini taʼminlash masalalari ham nomzod dasturida alohida yoʻnalish sifatida belgilanganligi eʼtirof etildi.

Farmatsevtika sohasini ham yanada rivojlantirish, tibbiyot va dorixona xodimlari orasidagi yashirin kelishuvlar orqali bemorlarga haddan ziyod dorilar sotib olishga undashga chek qoʻyiladi. Tibbiyotdagi korrupsiya holatlariga butunlay barham beriladi.

Tibbiyotchilar va farmatsevtlar orasida noqonuniy muloqot toʻliq taqiqlanadi. Bunday muloqotlar va sovgʻalar uchun jazo muqarrarligi taʼminlanadi. Umuman dorilarning yagona elektron bazasi tizimini yanada takomillashtirish orqali dori darmonlarning noqonuniy aylanmasiga chek qoʻyamiz.

-Nomzodning dasturida ilgari surilayotgan tibbiyotda malaka oshirishning markazlashgan tizimini qayta koʻrib chiqish, malaka oshirishni ixtisoslashgan markazlar va viloyatlarda tashkil etilishi ayni muddao- dedi Oliy Majlis Qonunchilik palatasi deputati Maxfurat Xushvaqtova,- “Aqlli tibbiyot” tizimining huquqiy asoslarini ishlab chiqib, sohaga zamonaviy axborot texnologiyalarini joriy etishni kengaytirish masalasi ham ilgari surilgan.  

Shuningdek, ishonchli vakil fuqarolik jamiyatini barpo etish atrofimizdagi ekologik muhitni asrab avaylash, xotin-qizlar va yoshlarning ijtimoiy siyosiy faolligini oshirish, adolatli tashqi siyosat yuritish borasida nomzod dasturida belgilangan ustuvor yoʻnalishlarga eʼtibor qaratdi.

Najmiddin Toʻrayev,

partiya faoli.