Aholi salomatligiga tahdid solayotgan muammo

Oʻzbekiston “Adolat” SDP Shahrisabz shahar Kengashi tomonidan Shahrisabz shahar Tibbiyot birlashmasi tadbirgohida “Dori vositalarining noqonuniy aylanishini oldini olish, narxlarining barqarorligini taʼminlash va ularni shifokor retseptisiz sotilishiga barham berish” mavzusida tadbir boʻlib oʻtdi. Unda partiya faollari, tibbiyot xodimlari, dorishunoslar va keng jamoatchilik vakillari qatnashdi.

Tadbirda sifatsiz dori vositalarining noqonuniy aylanmasiga qarshi kurash, dorixonalarda sotilayotgan dori darmonlar narxi oshib ketmasligiga erishish, narxlarni mahalliy Kengash deputatlarini jalb etgan xolda nazorat qilib turish, jamoatchilik nazoratini kuchaytirish, retseptsiz dori vositalari sotilishiga qarshi kurash olib borish, ommaviy axborot vositalari va ijtimoiy tarmoqlardagi dorilarning reklamasini muvofiqlashtirish haqida soʻz yuritildi.

— Dori vositalarining noqonuniy aylanishi va ularni isteʼmol qilinishiga yoʻl qoʻymaslik, kuchli taʼsir qiluvchi moddalar aylanishini tartibga solishni takomillashtirish, shu bilan birgalikda aholining sogʻligʻini saqlashni taʼminlash, har tomonlama barkamol avlodni tarbiyalash uchun qoʻshimcha imkoniyatlar va shart-sharoitlar yaratish bugungi kunning ustuvor vazifalaridan biridir,- dedi tadbirda xalq deputatlari Qashqadaryo viloyat Kengashi deputati Dilrabo Temirova. - Shuni alohida qayd etish kerakki, partiyamiz tomonidan sifatsiz dori vositalarining noqonuniy aylanishiga qarshi keng qamrovli ishlar olib borilyapti. Partiya faollari hamkorligida dorixonalardagi dorilarning narxini ham nazorat qilib boryapmiz. Biroq bular hali yetarli emas.

— Kuni kecha fuqarolardan “Adolat qabulxonasi” ga kelib tushgan murojaatda aytilishicha “Kaneferon” dorisini dorixonalarda bir qutisini 83 ming, ayrimlarida esa 73 ming soʻmdan sotilayotganligi maʼlum qilingan,- dedi partiyaning shahar Kengashi raisi Samariddin Zayniddinov. – Biz har qanday sharoitda ham dorilarning narxini nazorat qilib borishimiz kerak. Sifatsiz dori vositalarining sotilishiga yoʻl qoʻymasligimiz zarur. Kamida 19 goʻdakning oʻlimiga sababchi boʻlgan sifatsiz Dok-1 Maks preparati barchamizga saboq boʻlishi lozim.

Tadbirda shuningdek, kuchli taʼsir qiluvchi moddalar roʻyxatiga kiritilgan dori vositalarining noqonuniy chakana savdosi holatlariga barham berish borasida ham tushunchalar berildi. Partiya faollari, tibbiyot xodimlari va farmatsevtlar, ommaviy axborot vositalari va ijtimoiy tarmoqlar vakillari hamkorlikda ish yuritib sifatsiz dori vositalarining noqonuniy aylanishiga chek qoʻyish yuzasidan zarur chora – tadbirlar belgilab olishdi.

Azamat Berdiyev,
Xalq deputatlari Shahrisabz shahar Kengashi deputati.