Aholiga ko‘rsatilayotgan neyroxirurgiya xizmatining sifati ortmoqda

Tinchlik va sog‘liq – bu har bir inson, butun aholimiz uchun hech narsa bilan o‘lchab, baholab bo‘lmaydigan buyuk ne’mat. Sababi faqat sog‘lom inson va xalq mislsiz ishlarga qodir bo‘ladi.

Keyingi yillarda mamlakatimizda sog‘liqni saqlash tizimida amalga oshirilayotgan izchil islohotlar, avvalo, inson manfaatlarini ta’minlash, fuqarolarimiz salomatligini mustahkamlashga, ularning hayotdan, bugungi davr islohotlaridan rozi bo‘lib yashashiga xizmat qilayotir.

Tibbiyotdagi islohotlar natijasida so‘nggi yetti yilda neyroxirurgiya yo‘nalishi ham katta o‘zgarishlarga yuz tutdi. Xususan, ilgari faqat respublika markazida bajariladigan jarrohlik va davolash amaliyotlarining qariyb 40 foizi yurtimizning 14 ta hududida joriy etildi.

Neyroxirurgiya xizmatining ko‘lami va hajmi, tibbiy xizmat sifati viloyatlarda ortib borayotgani, mahalliy mutaxassislarning yosh bolalarda bosh miya nuqsonlarini yuqoritexnologik jarrohlik amaliyotlarini mustaqil ravishda bajarishi bunga yaqqol misoldir.

Quvonarlisi, bugun markazlar eng zamonaviy tibbiy asbob-uskunalar bilan jihozlangan bo‘lib, turli neyroxirurgik kasalliklariga chalingan bemorlarga yuqori malakali tibbiy yordam ko‘rsatmoqda.

Shuningdek, davlat tomonidan neyroxirurgiya yo‘nalishi bo‘yicha yosh mutaxassislarni xorijda malaka oshirishi faol qo‘llab-quvvatlanmoqda. Bu esa yosh shifokorlarga zamonaviy bilim va ko‘nikmalarga ega bo‘lib, keyinchalik olgan tajribalarini O‘zbekiston tibbiyotiga tatbiq qilishga imkon beradi.

Sohada olib borilayotgan islohotlar natijasida oxirgi 6 yilda o‘tkazilayotgan yuqori texnologik jarrohlik amaliyotlari soni 2018 yilga kelib, 9 955 ta, 2022 yilda esa 12 277 yetdi.

Prezidentimizning 2018 yil 7 dekabrdagi “O‘zbekiston Respublikasi sog‘liqni saqlash tizimini tubdan takomillashtirish bo‘yicha kompleks chora-tadbirlar to‘g‘risida”gi farmoni mamlakatimiz tibbiyoti taraqqiyotida yangi davrni boshlab berdi. Zero, mazkur hujjatga asosan neyroxirurgiya bo‘limlari zamonaviy texnik uskunalar bilan taminlandi.

2022 yilda hududlarda 223 nafar aholida o‘tkazilgan tibbiy ko‘riklarda 975 nafar bemor aniqlanib, ularning 114 nafarida jarrohlik amaliyotlari o‘tkazildi. Bunda, bajarilgan yuqori texnologiyali amaliyotlar ulushi 48 foizni tashkil etdi.

Shu bilan birga, 9 ta yangi jarrohlik amaliyotlari o‘zlashtirildi. Jumladan, epilepsiya, bosh miya falaji, insultni oldini olish va o‘tkir davrida davolash, bolalarda retinoblastoma kabi onkologik kasalligini qon tomir orqali ximioterapiya o‘tkazish, bosh miya o‘smalarini bemorlarni uyg‘oq holatida o‘tkazish va boshqa turdagi jarrohlik amaliyotlari yo‘lga qo‘yildi.

Bundan tashqari, 100 nafardan ortiq neyroxirurg-shifokorlar xorijning turli mamlakatlaridan O‘zbekistonda mahorat darslari o‘tkazish va konferensiyalarda qatnashish uchun keldi. 108 nafar mutaxassislar o‘z ish joylarida, 20 nafar mutaxassislar markazda, 15 nafar mutaxassislar xorijda yuqori texnologik amaliyotlar uchun qayta tayyorlandi.

Teletibbiyot orqali hududlarda har yili 30 ga yakin masofaviy tibbiy maslahatlar tashkil qilinib, bemorlarga yashash joyida davolanish imkoniyati yaratilib kelmoqda. 58 ta o‘rin viloyatlarda bolalar neyroxirurgiyasi uchun ajratildi. Tibbiy buyumlar va dori vositalari bilan ta’minlash esa 99 foizni tashkil yetdi.

Ushbu o‘zgarishlar respublikaning barcha hududlarini yuqori malakali mutaxassislar bilan ta’minlash, kadrlar salohiyatini mustahkamlash, neyroxirurg vrachlarning o‘z maktabini shakllantirish va rivojlantirish hamda neyroxirurgik kasalliklar profilaktikasi, diagnostikasi va ularni davolash sohasida mamlakatda ilmiy tadqiqotlar doirasini kengaytirish imkonini berdi.

Bu sa’y-harakatlar natijasida ilgari faqat respublika markazida bajariladigan jarrohlik va davolash amaliyotlarining qariyb 40 foizi hududlarda amalga oshirilyapti. Neyroxirurgiya xizmatining ko‘lami va hajmi, tibbiy xizmat sifati viloyatlarda ortib borayotgani esa e’tiborga molikdir.

Umuman olganda, neyroxirurgiya sohasini rivojlantirishga qaratilgan ushbu chora-tadbirlarining barchasi mamlakatimizda mazkur yo‘nalishda ko‘rsatilayotgan tibbiy xizmatlar sifatini sezilarli darajada yaxshilanishiga olib keldi. Asosiysi, bemorlar xorijga chiqmasdan O‘zbekistonning o‘zida tajribali mutaxassislardan malakali yordam olish imkoniyatiga ega bo‘ldi.

Mavludaxon ADHAMJONOVA,

Oliy Majlis Qonunchilik palatasi deputati