Aholiga oftalmologik kasalliklarni davolash bo‘yicha 172 turdagi tibbiy xizmatlar ko‘rsatilmoqda

Dunyoni ko‘z nuri bilan anglash, idrok etish insonga berilgan bebaho nemat. Sababi inson dunyo lazzatlarini sezgi a’zolari orqali idrok etsa, bu yorug‘ olamni ko‘z orqali ko‘radi. “Men barcha qadrli narsalarimni ko‘z qorachug‘imdek asrayman” degan gapning zamirida ham chuqur ma’no bor.

Ammo hayotda tug‘ma nuqsoni sababli yoki biror kasallik asoratlari, yohud ehtiyodkorsizligi oqibatida ko‘rish imkoniyatini yo‘qotgan insonlar ham bor.

So‘nggi yillarda O‘zbekiston tibbiyoti sohasida erishilgan eng katta yutuqlarimizdan biri aynan aholiga ko‘rsatilayotgan oftalmologiya sohasini rivojlantirish bilan bog‘liq bo‘lgani kishini quvontiradi.

Davlatimiz rahbarining 2017 yildagi tegishli qarori bilan yurtimizda oftalmologiya yo‘nalishida boshlangan ishlarni yanada rivojlantirish istiqbollari belgilab berildi. Ushbu hujjat ijrosining hayotimizga tadbiq etilishi natijasida Respublikada ixtisoslashtirilgan tibbiyot markazlari, shu jumladan, xirurgiya, kardiologiya, ko‘z mikroxirurgiyasi kabi o‘nlab yo‘nalishlarda zamonaviy asbob-uskunalar bilan jihozlangan va yuqori malakali vrachlar bilan to‘ldirilgan markazlar faoliyati yo‘lga qo‘yildi.

Xususan, aholiga ko‘rsatilayotgan oftalmologiya xizmati sifatini oshirish maqsadida 2018-2022 yillarda Respublika ixtisoslashtirilgan ko‘z mikroxirurgiyasi ilmiy-amaliy tibbiyot markaziga 4,5 mln AQSH dollar qiymatidagi 145 ta yuqori texnologik tibbiy uskunalar olib kelinib, xizmat ko‘rsatish yo‘lga qo‘yildi.

Natijada 49 turdagi oftalmologik kasalliklarni davolash bo‘yicha 172 turdagi tibbiy xizmatlar ko‘rsatishga, ko‘z mikroxirurgiyasi markazida dunyo andozalariga mos ravishda jarrohlik faolligi 99,4 foizga yetishiga erishildi. O‘tkazilayotkan yuqori texnologik jarrohlik amaliyotlar soni avval yiliga 10 000 ga yetmagan bo‘lsa, 2022 yilda 16 000 dan ortiq operatsiya bajarildi.

Albatta, bugun tibbiyot rivoji nafaqat zamonaviy, yuqori aniqlikka ega bo‘lgan asbob-uskunlar shu bilan birga, kadrlar salohiyatiga ham bevosita bog‘liq. Shu bois, 2018-2022 yillarda ushbu soha mutaxassislarining 50 nafari Fransiya, Turkiya, Armeniya, Avstriya, Kazaxstan, Latviya, Koreya, Rossiya, Belorussiya kabi davlatlarda malaka oshirib kelishdi. Rossiya, Turkiya, Isroil, Hindiston, Xitoy davlatlardan jami 20 nafar yaqin xorijiy mutaxassislarning Markazga tashrifi davomida 1 000 dan ortiq murakkab jarrohlik amaliyotlari o‘tkazildi.

Ushbu o‘zgarishlar faqat markazning o‘zi bilan cheklanib qolmay, uning hududlardagi deyarli barcha filiallarida katarakta jarrohligining “Oltin standarti” katarakta fakoemulsifikatsiya, ko‘z olmasining oldi va orqa qismidagi barcha turdagi lazer jarrohliklari usullari, optik kogerent tomografiya (OKT), ultratovushli biomikroskopiya (UBM) diagnostika usullari keng joriy qilindi.

Masalan, Qoraqalpog‘iston Respublikasi, Samarqand va Buxoro filiallarida ilk bora keratoplastika va vitreoretinal jarrohlik usullari amaliyotga joriy etildi. Bundan bir necha kun oldin ya’niy 25 avgust kuni Navoiy viloyatidagi filialda ilk bora ko‘z olmasining oldi va orqa qismidagi lazer jarrohlik usullari va asoratli katarakta sun’iy ko‘z gavharini ko‘z sklerasiga tikish amaliyoti muvafaqiyatli bajarildi.

Oftalmologiya xizmatini aholiga yanada yaqinlashtirish maqsadida esa mamlakatimizda ishlab chiqariladigan “ISUZU” rusumidagi avtobuslar negizida 13 dona mobil poliklinika tashkil etildi va 5 xil zamonaviy oftalmologik uskunalar bilan jihozlandi. Ushbu mobil poliklinikalar hududiy tibbiyot boshqarmalari bilan kelishgan holda reja asosida haftada bir – uch marta ehtiyojga qarab shahar va tumanlarga, ishlab chiqarish korxonalariga chiqib aholini tibbiy ko‘rikdan o‘tkazib kelmoqda.

Ochig‘i, bugun bunday misollarni yana ko‘plab keltirish mumkin. Bunday yuksak marralarga, albatta, mustaqillik tufayli va oxirgi yillarda Prezidentimiz boshchiligida sog‘liqni saqlash sohasida amalga oshirilayotgan islohotlar natijasida erishyapmiz. Zero, o‘tgan davrda har bir fuqaro o‘z orzu-umidlariga mos ravishda hayot kechirish, ozod va obod yashash baxtiga muyassar bo‘ldi.

Bir so‘z bilan aytganda, aholiga ko‘rsatilayotgan oftalmologiya xizmati sifatini yaxshilash borasidagi ishlar misolida mamlakatimiz tibbiyot sohasida erishilayotgan natijalarni bugun minglab bemorlar o‘z hayotlarida his qilayotir. Eng muhimi, yuzlab oilalar o‘z farzandi yo yaqinini davolatish uchun misqollab mablag‘ yig‘ib, ortiqcha ovvoragarchiliklar bilan xorijiy davlatlarga bormasdan shu yerning o‘zida ixtisoslashtirilgan tibbiy xizmatlardan foydalanmoqda.

Maxfirat XUSHVAQTOVA,

Oliy Majlis Qonunchilik palatasi deputati