Aholining tibbiy madaniyatini oshirish — davr talabi

Oʻzbekiston “Adolat” SDP Qashqadaryo viloyat Kengashi va Qarshi shahar tibbiyot birlashmasi hamkorligida Qarshi shahridagi tibbiyot texnikumi tadbirgohida “Aholining tibbiy madaniyatini oshirish, sogʻliqni saqlash tizimiga zamonaviy axborot-kommunikatsiya texnologiyalarini joriy etish” mavzusida tadbir boʻlib oʻtdi. Tibbiyot xodimlari, partiya faollari va keng jamoatchilik hamda ommaviy axborot vositalari ishtirok etgan tadbirda Qarshi shahar tibbiyot birlashmasi bosh shifokori A.Ashurov maʼruza qildi.

— Muhtaram Prezidentimiz aholimizga tibbiy xizmat koʻrsatish sifatini yaxshilash uchun barcha chora-tadbirlarni koʻryaptilar. Bu haqda Davlatimiz rahbari 2022-yil 20-dekabrdagi Oliy Majlisga va Oʻzbekiston xalqiga yoʻllagan Murojaatnomasida ham alohida qayd etib oʻtdilar. Aholiga sifatli va oʻz vaqtida tibbiy xizmatlar koʻrsatishni taʼminlashda, shu jumladan, davlat tomonidan kafolatlangan hajmlarda, Vazirlikning organlari va tashkilotlari rahbarlarining roli va masʼuliyatini oshirishga ham alohida eʼtibor qaratyaptilar. Fuqarolarning sogʻligʻini saqlash sohasida yagona davlat siyosatini amalga oshirish kerak. Buning uchun jamoat sogʻligʻini saqlash, kasalliklarni profilaktika qilish va oldini olish, patronaj xizmati va fuqarolarni uyma-uy yurib koʻrib chiqish, aholini sogʻlom turmush tarzini kechirishga undash, ularning tibbiy savodxonligini oshirish ham bizning asosiy vazifalarimizdan ekanligini unutmasligimiz kerak.

— Biz har qanday sharoitda ham aholining tibbiy madaniyatini oshirishimiz kerak,- dedi xalq deputatlari Qarshi shahar Kengashi deputati, tibbiyot texnikumi direktori Qahramon Roʻziboyev. — Eng avvalo, biz shu kecha kunduzda ayniqsa, oʻsib kelayotgan yosh avlodni oʻz sogʻligʻi va atrofidagilar sogʻligʻini muhofaza qilish ruhida tarbiyalashimiz kerak. Shuningdek, tibbiy yordamni aholiga yaqinlashtirish ham axborot texnologiyalarini (teletibbiyot), meditsina standartlarini, protokollar va tavsiyalarni keng miqyosda joriy etish hamda yetakchi xorijiy va mahalliy mutaxassislarning tajribasini mintaqaviy tibbiyot muassasalarining tibbiyot xodimlariga oʻrgatish orqali ham sohada birmuncha taraqqiyotga erishish mumkin. Shu asosda aholiga koʻrsatilayotgan birlamchi tibbiy-sanitar, shoshilinch va ixtisoslashtirilgan tibbiy yordam sifati, ommabopligi va tezkorligini oshirishga erishiladi.

Darhaqiqat, tadbirda bugungi kunda yuqori tashkilotlarga fuqarolardan kelib tushayotgan murojaatlarning aksariyat qismi tibbiyot tizimi va undagi kamchiliklar bilan bogʻliq ekanligi aytib oʻtildi. Aholiga har tomonlama sifatli tibbiy xizmat koʻrsatish bugungi kunning sira kechiktirib boʻlmaydigan vazifalaridan biridir. Ammo ayrim tibbiyot muassasalarida bemorga notoʻgʻri tashxis qoʻyish, odamlarning malakali mutaxassislar qabuliga uzoq vaqt navbat kutib turib qolayotgani ham sir emas. Ayni shu holat aholi noroziligiga, tibbiy xizmat koʻrsatish sifati tushishiga sabab boʻlmoqda. Markaziy oilaviy poliklinikalarda haligacha turnaqator navbatlar mavjud, Elektron navbat joriy etilmas ekan, bu muammo saqlanib qolaveradi.

Tadbirda soʻzga chiqqanlar tomonidan aholining tibbiy madaniyatini oshirish, fuqarolarni sogʻlom turmush tarziga oʻrgatish maqsadida aholi orasida koʻplab targʻibot tadbirlari olib borilishi zarurligi aytildi. Bundan tashqari, fuqarolar salomatligini saqlash uchun eng avvalo, sifatli oziq-ovqat mahsulotlari ishlab chiqarilishiga erishish kerakligi alohida qayd etildi. Aholi salomatligiga salbiy taʼsir etuvchi oziq-ovqat mahsulotlarini yoʻq qilish, toʻgʻri ovqatlanish, jismoniy mashqlar, kasalliklar profilaktikasi boʻyicha koʻplab qoʻllanmalar ishlab chiqilib, xonadonlarga tarqatilish lozimligi taʼkidlandi.

Tadbir soʻngida ishtirokchilar oʻzlarini qiziqtirgan savollariga mutaxassislardan kerakli javoblar oldilar.

Dilafruz Toʻychiyeva,
“Adolat” SDP Qarshi shahar Kengashi faoli.