Aholining tibbiy madaniyatini oshirish va sogʻlomlashtirish

  “Adolat” sotsial-demokratik partiyasi Xorazm viloyat Kengashi, partiyaning Yangibozor tuman Kengashi hamda Respublika ixtisoslashtirilgan onkologiya va radiologiya ilmiy-amaliy tibbiyot birlashmasi Xorazm filiali bilan hamkorlikda partiyaning “Salomatlik yoʻlida birlashaylik!” loyihasi doirasida Yangibozor tuman tibbiyot birlashmasida “Aholining tibbiy madaniyatini oshirish va sifatli tibbiy xizmat koʻrsatish — ustuvor vazifalardan biridir” mavzusida davra suhbati tashkil etildi.

  Tadbirda partiya faollari, deputatlari, tibbiyot sohasi xodimlari, xalq deputatlari tuman Kengashi kotibiyati yetakchilari ishtirok etishdi.

    Tadbirni partiyaning viloyat Kengashi raisi oʻrinbosari Ulugʻbek Quryazov kirish soʻzi bilan ochib berdi. Unda, zamonaviy, yuqori texnologiyali, samarali tez tibbiy yordam xizmatini shakllantirish choralarini koʻrish, shoshilinch tez tibbiy yordam xizmatining tezkorligi xalqaro eʼtirof etilgan talablarga mos boʻlishi, uni boshqarishni axborot tizimini joriy qilish va moddiy-texnika bazasini mustahkamlash partiyaning saylovoldi dasturida asosiy masala sifatida ilgari surilgani va hayotga tatbiq etilib kelinayotgani toʻgʻrisida taʼkidlandi. Shuningdek, partiya tibbiy faoliyat ustidan davlat — sanitariya nazoratini kuchaytirish, dorilarni vrach retsepti asosida berilishini yoʻlga qoʻyish hamda dorilar reklamasini cheklashga qaratilgan qonunlarni qabul qilish tashabbusi bilan chiqilgani ishtirokchilar diqqat markazidan joy oldi.

Shundan soʻng, RIO va RIOTM Xorazm viloyat filiali ximioterapiya boʻlimi mudiri, onkolog shifokor Roʻzmat Gʻofurov soʻzga chiqib, davlatimiz tomonidan tibbiyot sohasi rivoji uchun yaratilayotgan imkoniyatlar, olib borilayotgan islohotlar xususida soʻz yuritdi. Shuningdek, aholining tibbiy madaniyati va bilimini oshirish dolzarb masalalardan ekani, oʻtkazilayotgan tibbiy koʻriklardan samarali foydalanish sogʻligi uchun muhim ekanini toʻgʻrisida aholiga tushuntirish ishlarini kuchaytirish oʻz navbatida bemorda aniqlanayotgan, ayniqsa kechikib aniqlangan kasallikni oldini olishga erishilishi toʻgʻrisida bir qator hayotiy misollar bilan tushuntirib berdi.  

  Ravshan Gʻulomov, Yangibozor TTB shifokori, tadbir ishtirokchisi:

• Boʻlib oʻtgan tadbir jamoamizning har bir xodimi zimmasiga yanada jiddiy masʼuliyat yukladi. Ustoz shifokorlar tomonidan ilgari surilgan tashabbus, sohadagi ishbilarmonlik, aholiga sifatli tibbiy yordam koʻrsatish va ularning tibbiy bilimlarini oshirish borasidagi targʻibot ishlarini tizimli yoʻlga qoʻyishdagi tajribalari faoliyatimizda dasturilamal vazifasini oʻtaydi. Tashkilotchilarga rahmat.    

Fikr-mulohazalar, taklif va tavsiyalar qizgʻin tus olgan tadbir soʻngida ishtirokchilar oʻzlarini qiziqtirgan savollariga atroflicha javoblar olishdi.

Bir soʻz bilan aytganda, hamkorlikdagi bu kabi ochiq muloqotlar soha rivoji, tibbiyot xodimlarining ishchanlik kayfiyatini oshirish orqali aholi salomatligini mustahkamlab borilishiga xizmat qiladi.

                                                                                                            Zamira ABDULLAYEVA,

 “Adolat” SDP Xorazm viloyat Kengashi matbuot kotibi