Andijonlik “adolatchilar” Boburga taʼzimda

Oʻzbekiston “Adolat” SDP Andijon viloyat kengashi tashabbusi bilan Izboskan tumanida Zahiriddin Muhammad Bobur tavalludining 540-yilligi munosabati bilan maʼnaviy-marifiy, adabiy-musiqiy tadbir oʻtkazildi. Unda partiya faollari, faol yoshlar va Bobur ijodining ixlosmandlari ishtirok etdilar.

Tadbirda soʻz olganlar benazir shoir, qomusiy olim va mohir sarkarda hayoti va ijodi haqida toʻlqinlanib gapirdilar. Sheʼrlarining tili, oʻziga xosligi, Vatan mavzusi keng oʻrin olganligi eʼtirof etildi.

Zuxra Komilova, partiya faoli:

-Bobur siymosiga qancha taʼzim qilsak, oʻrgansak arziydi. Bugungi tadbirning asl maqsadi ham yoshlar qalbiga Bobur merosini singdirish barobarida vatanga sadoqat, milliy va umuminsoniy qadriyatlarga hurmat ruhida tarbiyalash, milliy va madaniy merosimizni asrashni oʻrgatishdan iborat. Bu borada “Boburnoma” barchamiz uchun katta maktab. Mazkur asar oradan yillar oʻtsa-da bizni vatanparvarlikka, ona yurtimizni sevishga oʻrgatadi.

Taʼkidlanganidek, jahon tarixida oʻchmas iz qoldirgan betakror siymolardan biri sifatida Bobur butun dunyoda maʼlum va mashhur. Uning beqiyos ilmiy-ijodiy merosi nafaqat milliy madaniyatimiz va xalqimiz adabiy-estetik tafakkurining shakllanishida, balki jahon adabiyoti, ilm-fani va davlatchiligi tarixida alohida oʻringa ega. Boburning avlodlari sifatida biz bu bilan faxrlanamiz.

Tadbir davomida Bobur qalamiga mansub gʻazallar oʻqildi, sahnada shoir siymosi gavdalandi. Faol ishtirokchilar esdalik sovgʻalari bilan taqdirlandi.

“Adolat” SDP Andijon viloyat kengashi

Matbuot xizmati.