Aralash saylov tizimi qanday?

Ayni vaqtda jamoatchilik orasida yuqoridagi savol yurgani bor gap. Chindan ham Oʻzbekistonda aralash saylov tizimiga oʻtish masalasi qoʻyilmoqda. Bu qanday boʻladi? Oliy Majlis Qonunchilik palatasi deputati Mavluda Adhamjonovaning Andijon tumanidagi mahalla fuqarolar yigʻinlari raislari bilan uchrashuvi ayni shu masalaga bagʻishlandi.

Deputat dastlab yigʻilganlarga amaldagi yilda qabul qilingan yangi tahrirdagi Oʻzbekiston Respublikasining Konstitutsiyasi, ayrim qonun hujjatlariga kiritilgan oʻzgartishlar, saylov oʻtkazish tartibi yanada takomillashtirilayotgani haqida tushuncha berdi. Oʻz oʻrnida Konstitutsiyaviy qonun loyihasi bilan Saylov kodeksi hamda 7 ta qonunga oʻzgartirish va qoʻshimchalar kiritish nazarda tutilayotganiga yigʻilganlar eʼtiborini qaratdi.

Mavluda Adhamjonova, Oliy Majlis Qonunchilik palatasi deputati:

-Endi deputatlar saylovi majoritar va proporsional tizimi asosida oʻtkazilishi mumkin. Shunda saylov okruglari bir mandatli va yagona saylov okruglariga ajratiladi. Tushunarli qilib aytganda, qonunchilik palatasining 75 nafar deputati majoritar saylov tizimi asosida bir mandatli saylov okruglaridan, qolgan 75 nafari proporsional saylov tizimi asosida, yaʼni siyosiy partiyalarga berilgan ovozlar boʻyicha yagona saylov okrugidan saylanadi.

Taʼkidlanganidek, saylov tizimida kuzatiladigan bu oʻzgarish siyosiy partiyalarning jamiyatdagi rolini ham yanada oshiradi. Shu sabab bugun partiya faollari jamoatchilik orasiga yanada chuqur kirib borishga eʼtibor qaratmoqda.

“Adolat” SDP Andijon viloyati kengashi

Matbuot xizmati.