Asosiy maqsad - aholining roziligi

Mamlakatimiz Prezidenti Shavkat Mirziyoyev qisqa muddat ichida xalq manfaatiga xizmat qiladigan ulkan bunyodkorlik islohotlarini amalga oshirdi. Islohotlar bilan birgalikda aholining dunyoqarashi, turmush tarzi oʻzgara boshladi. Sayyor va ommaviy qabullar orqali barcha turdagi rahbarlar xalq bilan yanada yaqinlashib, mavjud muammolarning aniq tahlili vujudga keldi.

Xalq deputatlari Chinoz tuman Kengashi deputati Nigora Muhammadiyeva xalq dardi bilan yashayotgan jonkuyar xalq deputatlaridan hisoblanadi. U oʻz zimmasidagi masʼuliyatli vazifalarni sidqidildan ado etib kelmoqda. Xususan, deputat joylardagi kam taʼminlangan va ehtiyojmand kishilar, keksalar va nogironligi boʻlgan aholi vakillari holidan xabar olib, ularning muammolarini bartaraf etishga alohida eʼtibor qaratib kelmoqda.

Deputati Nigora Muhammadiyeva tashabbusi bilan tumanidagi “Amir Temur” MFYda sayyor qabul oʻtkazildi. Unda xalq noibi tomonidan oʻzi saylangan saylov okrugidagi aholi vakillarining muammo va takliflari tinglandi.

Sayyor qabulda fuqarolar “Amir Temur” mahallasi 1-tor koʻchasini gazlashtirish, ichki yoʻllarni asfaltlash hamda elektr tizimidagi uzilishlarni bartaraf etish hamda “Markaz” mahallasi 3-tor koʻchasida eskirgan elektr sim yogʻochlarini yangilariga almashtirish kabi mavjud muammolar yuzasidan amaliy yordam berishni soʻradilar.

Deputat N.Muhammadiyeva murojaatchilarning talab va istaklarini atroflicha oʻrganib, tegishli maslahatlar berdi va bayon etilgan muammolar yuzasidan mutasaddi tashkilotlarga deputatlik soʻrovlarini joʻnatib, ijrosini nazoratga oldi.

Oʻzbekiston “Adolat” SDP
Toshkent viloyati Kengashi matbuot xizmati.