Asosiy maqsad inson qadri, xalq manfaatlarini amalda taʼminlash

Keyingi yillarda mamlakatimizda ulkan ishlar amalga oshirilmoqda, zalvorli yutuqlar qoʻlga kiritilmoqda. Bu borada, shubhasiz, Prezidentimiz tomonidan ilgari surilayotgan yangi gʻoyalar va tashabbuslar hamda olib borilayotgan oqilona siyosat oʻzining keng qamrovli ekanligi bilan ijobiy samarasini bermoqda.

Shu oʻrinda taʼkidlash joizki, ushbu yaratilayotgan imkoniyatlar, shart-sharoitlar, izchil islohotlarning barchasi inson qadri va xalq manfaatlari yoʻlida xizmat qilmoqda. Bunda mamlakatda olib borilayotgan samarali boshqaruv tizimi alohida oʻrin tutadi. Unda ilgari surilayotgan tamoyillar adolatli, xalqchil boʻlishiga eʼtibor borgan sari kuchaymoqda.

Albatta, bu yutuqlarning zamirida uzoqni koʻzlab yuritilayotgan oqilona ichki va tashqi siyosat, ulkan zahmat, izlanish, donishmandlik, mustaqil Vatanimizga, ona xalqimizga cheksiz mehr, eng muhimi, katta siyosiy iroda mujassam.

Yangi qonunlar qabul qilindi, barcha darajadagi xalq vakillik va ijro organlari tarkibi davriylik prinsipi asosida tubdan yangilandi.

Davlatimiz rahbari tomonidan Murojaatnomada 2023-yilni “Insonga eʼtibor va sifatli taʼlim yili” deb eʼlon qilinishi ham bu boradagi olib borilayotgan ishlarning uzviy davomi boʻldi.

“Albatta, erishayotgan barcha yutuqlarimiz, inson qadri ulugʻ boʻlgan diyor – Yangi Oʻzbekistonni barpo etish yoʻlidagi dastlabki natijalardir”, — dedi Prezidentimiz oʻz nutqida. — “Biz bunyodkor xalqimiz bilan birga bunday ezgu ishlarni davom ettiramiz va oldimizga qoʻygan katta-katta marralarga albatta erishamiz”.

Darhaqiqat, buning uchun biz, avvalo, Vatanimizda mustahkam qaror topgan tinchlik-osoyishtalikning, yaratilayotgan keng imkoniyatlarning qadriga yetishimiz zarur. Ayni paytda, ulardan samarali foydalangan holda butun kuch-gʻayrat va iqtidorimizni ayamay, el-yurtimizning buguni va ertagi kunining yanada farovon, yanada toʻkin va osuda boʻlishi uchun barchamiz bir yoqadan bosh chiqarib, buyuk xalqimizga farzandlik mehri va sadoqati bilan xizmat qilishimiz darkor.

Orif SHUKUROV,

“Adolat” SDP Jizzax viloyat Kengashi raisi