Axborot texnologiyalari va xavfsizlik

Namanganda yaqinda “Kibermakonda sodir etiladigan jinoyatlarga qarshi kurashish haftaligi” — “Cyber-Week” kompleks targʻibot-tashviqot doirasidagi tanlovlar gʻolib va sovrindorlarini taqdirlash marosimi oʻtkazildi.

Unda viloyat hokimligi va Ichki ishlar vazirligi tezkor-qidiruv departamenti Kiberxavfsizlik markazi hamkorligida joylarda targʻibot-tashviqot tadbirlari tashkil etilib, sohaviy xizmat xodimlari, shuningdek, 40 dan ortiq korxona, muassasa va tashkilotlar hamda ommaviy axborot vositalari vakillari, blogerlar jalb etildi.

— Mazkur tadbir juda koʻpchilikda katta qiziqish uygʻotdi, — deydi “Adolat” SDP Namangan shahar kengashi raisi Mirzarahmat Olimov. — Bugungi kunda axborot texnologiyalari kirib kelmagan soha qolmadi. Ular koʻp yumushlarni yengillashtirish imkonini bermoqda. Shu bilan birga xavfsizlik masalalarini ham unutish mumkin emas. Haftalik doirasida bu borada anchagina maʼlumotlar oldik.

Marosimda qayd etilganidek, haftalik mobaynida faol fuqarolar tomonidan 400 dan ziyod kiberxavfsizlik mavzusidagi axborotlar (videokontentlar) tayyorlanib, undan ijtimoiy tarmoqlarning 100 mingdan koʻproq foydalanuvchilari xabardor boʻlishdi. Bundan tashqari, kanal va guruhlar orqali kiberjinoyatlar, kibertahdidlar bilan bogʻliq 500 dan ortiq maʼlumotlar targʻib qilindi.

“Cyber-Week” haftaligi doirasida aholining turli qatlamlarini qamrab olgan yetti yoʻnalishdagi tanlov samarali tadbirlardan biri sifatida yodda qoladigan boʻldi. Tadbirning har bir ishtirokchisi foydalanuvchilarga keng koʻlamli targʻibot materiallarini taqdim etishga harakat qildilar.

Namangan shahridagi 14-umumtaʼlim maktabi oʻquvchisi Nosirjon Jamoliddinov ustozi Alisher Zayniddinov bilan birgalikda haftalik doirasida kibertahdid profilaktikasi bilan bogʻliq 1700 dan koʻproq materialni targʻib qilishga ulgurdi.

Viloyat Madaniyat markazida haftalik natijalari tahlil qilinib, yakunda tanlovning 21 nafar gʻolibiga tashkilotchilarning tashakkurnoma hamda qimmatbaho sovgʻalari tantanali topshirildi.

Farhodbek ABDULLAYEV,
“Adolat” SDP faoli.