Ayol koʻzlaridan yosh oqmasin

Ulugʻ mutafakkirlarimizdan biri, agar dunyoning qaysidir bir burchagida ayol xoʻrlik va zorlikdan koʻz yosh toʻkar ekan, bu jamiyatni baxtiyor, deb atamoq nojoiz deb qoldirgan satrlari bugun har birimizni sergak tortishi zarur. Xotin- qizlarga koʻrsatilayotgan zoʻravonliklar, suiqasdlar afsuski, bugun sizu biz yashayotgan davr ogʻriqlariga aylanib qolayotgani sir emas.

Qoʻqon shahridagi N.M. ismli ayol yaxshi niyatlar bilan S.M. bilan turmush quradi. Afsuski, orzulari armonga aylanadi. Ichkilikka mukkasidan ketgan erkak oilasi, farzandlari oldida masʼuliyatni his qilmay yillar davomida ayoliga zugʻum oʻtkazib keladi. Oilani muqaddas bilgan ayol esa sabr-qanoat bilan turmushini davom ettirishga intiladi, 3 nafar farzandini tirik etim qilishni istamaydi. Ammo, pichoq borib suyakka qadaladi. Tinimsiz kaltaklar zarbidan ayol jismonan nochor, ruhiy tushkunlik iskanjasiga qoladi.  

Fargʻona viloyat reabilitatsiya boʻlimining tumanlararo Qoʻqon shahar markazida 3 oy davomida ayol bilan psixologik suhbatlar olib borilib, hayotga boʻlgan muhabbati, farzandlari kelajagiga boʻlgan ishonchini qayta tiklashga erishildi. Fargʻona viloyat reabilitatsiya markazi va “Adolat” SDP ayollar qanoati aralashuvi bilan ayol farzandlari bilan Qoʻqon shahridagi ijtimoiy uyga joylashtirildi.

“Ayollarni zoʻravonlikdan himoyalaymiz” partiya shiori ostida Fargʻona viloyat reabilitatsiya markazi, hamkor tashkilotlar, ichki ishlar organlarining masʼul xodimlari hamkorligida bu kabi koʻmakka muhtoj ayollarga yordam koʻrsatish, ularni haq –huquqlarini himoya qilish va jamiyatda oʻz oʻrnilarini topishlari uchun doimo harakatdamiz,- deydi Qoʻqon shahar ayollar qanoati raisi Dilfuzaxon Dehqonova.

– Momolarimiz buyuk daholarni tarbiyalab, farzandi kamolida shukronalik baxti bilan yashaganlar. Hayotda taqdir zarbalariga uchragan onalarimiz jamiyatimizdagi baxtiyor onalarimiz kabi baxtli yashashga haqli.  

                                                                             “Adolat” SDP  Farg’ona viloyat kengashi Matbuot xizmati.