Ayol – muqaddas, moʻjiza yaratuvchi

Odamzod yaralibdiki, avlodimiz davomchilari hisoblanmish xotin-qizlarga alohida hurmat bilan qarab keladi.

Darhaqiqat, muqaddas Qurʼoni Karimning eng katta suralaridan biri – “Niso” surasida ham opa- singillarimiz ulugʻlanadi. Yetmish ikki ming olamni yaratgan Alloh ushbu surada insonlarni ayollarga adolatli munosabatda boʻlishga daʼvat etadi va bu ilohiy soʻzlar zamirida teran hikmat borligi qalblarni junbishga keltiradi.

Muhtaram ayollar haqida gapirganda, yana bir muhim jihatga eʼtibor qaratish joiz. Har qanday Inson – onaning farzandi. Hayotga shunday mard, jasur, fidoiy, oqila va daho farzand yetkazib bergan onani eʼzozlamasak boʻladimi. Keyingi paytda ana shu faol opa-singillarimizni davlat va jamoat tashkilotlarida istagancha uchratish mumkin.

Bugun boʻlib oʻtgan, 8 mart — Xalqaro xotin-qizlar kuni munosabati bilan “Adolat” SDP Kitob tumani Kengashi va tuman hokimligi hamkorligida hududdagi istirohat bogʻida “Sen bari bir muqaddassan ayol” mavzusidagi bayram tadbirida ham shular xususida soʻz yuritildi.

— Hozir Oʻzbekiston “Adolat” SDP Qashqadaryo viloyat Kengashi saflarida 50 ming nafardan ortiq aʼzolar uyushgan boʻlsa, shularning qariyb 20 ming nafarini xotin-qizlar tashkil etadi,- dedi xalq deputatlari viloyat Kengashi deputati Abduqahhor Ahmedov.- Haqiqatdan ham ayol kichik oilaninggina emas, jamiyatning ham gultojidir. Eʼtibor berib qarasangiz, qaysi jamoada boʻlmasin agar ayol faoliyat yuritsa, albatta u yerdan samimiylikning, mehrning, nafosatning hidi keladi. Olamshumul baxtning nafasi yeladi. Shu kecha kunduzda qaysi jabhaga qaramang xotin-qizlarimiz hamma jabhada oʻz faolliklarini namoyon etishyapti. Bir nechta xorijiy tillarni oʻzlashtirib, kompyuter bilan bemalol tillashib, dillashib yangiliklar yaratishyapti.

Tadbirda ayolning nafosati va nazokati, vafo va sadoqati, aql-zakovati va fidoyiligi asrlar mobaynida yer yuzida hayot davomiyligi va abadiyligiga asos boʻlib kelayotganligi eʼtirof etildi. Xalq deputatlari tuman Kengashi deputati Marhabo Shukurullayeva, viloyat Kengashi raisi oʻrinbosari Gulnoza Rajabova va boshqalar ham soʻzga chiqib, dunyodagi eng buyuk badiiy va sanʼat asarlari, qoʻshiq va dostonlar, qasidalar, meʼmoriy obidalar aziz va mukarram ayollar shaʼniga bagʻishlanganligini alohida mamnuniyat bilan taʼkidlashdi. Shuningdek, tadbirda oila va jamiyatimiz ustuni, farovon hayotimizning fayzi va koʻrki boʻlgan munis opa-singillarimizni eʼzozlash, ularga hurmat va ehtirom koʻrsatish xalqimiz uchun azal-azaldan buyuk qadriyat boʻlib kelgan va shunday boʻlib qoladi.

Tadbir nihoyasida barcha jabhada alohida namuna koʻrsatib mehnat qilayotgan xotin-qizlar e'tirof etilib, partiya tuman Kengashi va hamkor tashkilotlar tomonidan qimmatbaho sovgʻalar bilan taqdirlandi.

Muqaddas Murodova,
Xalq deputatlari Kitob
tumani Kengashi deputati.