“Ayollar qanoti” faollari mahallada

“Adolat” SDP Andijon viloyat kengashi “Ayollar qanoti” faollari tomonidan Prezidentimizning Oliy Majlis va Oʻzbekiston xalqiga yoʻllagan Murojaatnomasining mazmun-mohiyatini jamoatchilikka yetkazishga qaratilgan targʻibot tadbirlari tashkil etilib, unda Davlatimiz rahbari oʻz murojaatida ilgari surgan ustuvor vazifalar chuqur oʻrganilmoqda. Eʼtiborlisi, bunday tadbirlarga vaqtincha ishsiz va uyda oʻtirgan xotin-qizlar ham jalb etilyapti. Andijon shahridagi “Navbahor” MFYda oʻtkazilgan davra suhbati ham ayni shu maqsadga qaratildi.

Partiya viloyat kengashi raisi oʻrinbosari Maloxatxon Musayeva ishtirokchilarga Murojaatnomada ilgari surilgan fikrlar, undan kelib chiqadigan vazifalar yuzasidan atroflicha tushunchalar berdi. Murojaatnoma bilan mamlakatimizda inson qadri va manfaati ustuvor ekanligi amalda yana bir bor oʻz ifodasini topdi.

Taʼkidlanganidek, 2023-yilga “Insonga eʼtibor va sifatli taʼlim yili”, deya nom berilgani yurtdoshlarimizni quvontirdi. Jumladan, taʼlim va tibbiyot sohasida katta oʻzgarishlar qilinishi, aholiga tibbiy xizmat koʻrsatishni yanada yaxshilash borasidagi koʻrsatmalar kelajak sari muhim qadamdir. Andijonliklar ilgari surilayotgan ezgu daʼvatdan ruhlangani, kuch olgani davra suhbatida bildirilgan fikrlarda koʻzga tashlandi.

Maloxatxon Musayeva, “Adolat” SDP Andijon viloyat kengashi raisi oʻrinbosari:

— Prezidentimiz tomonidan koʻplab xalqchil taklif va tashabbuslar ilgari surildi. Ertangi kunda ularning roʻyobga chiqishi, albatta, Yangi Oʻzbekistonning gullab-yashnashiga xizmat qiladi, odamlarni hayotidan rozi boʻlishini taʼminlaydi. Shu bois, bugun Murojaatnoma targʻiboti har birimizdan faollikni talab qilmoqda.

“Ayollar qanoti” faollarining MFYlardagi targʻibot tadbirlari davom etmoqda.

“Adolat” SDP Andijon viloyat kengashi

Matbuot xizmati.