Ayollar salomatligini saqlash yoʻlida

Bugun barchamizni oʻylashga majbur qilayotgan eng ogʻir dardlardan biri boʻlmish, onkologik kasalliklarni oldini olish va davolash yuzasidan mamlakatimizda qator ijobiy ishlar amalga oshirilmoqda. Onkologik kasalliklarni erta bosqichlarda aniqlash maqsadida Respublika boʻylab koʻkrak bezi, bachadon boʻyni saratoni boʻyicha skrining tadqiqotlari olib borilmoqda.

Ushbu rejali ishlarni, bemorlarga yaratilgan hozirgi kundagi shart-sharoitlarni oʻrganish maqsadida Samarqand viloyat kengashi deputati Sanobar Mirsaidova Respublika ixtisoslashtirilgan onkologiya va radiologiya ilmiy-amaliy tibbiyot markazi Samarqand viloyat filialiga tashrif buyurdi.

Ushbu markazda “Elekta Infinity” firmasining zamonaviy chiziqli tezlatkich nur berish uskunasi oʻrnatilgan boʻlib, bu mamlakatimizda onkologik kasalliklar bilan kasallangan bemorlarga sifatli tibbiy xizmat koʻrsatishning yangi bosqichiga oʻtilganligidan darak bermoqda. Ushbu zamonaviy uskunaning imkoniyatlari juda keng, u davolovchi nurni nishonga maksimal aniqlikda va dozada berishga qodir, shuningdek, sogʻlom toʻqima hamda aʼzolar zararlanishini minimal darajada qisqartiradi. Ushbu meʼyorga amal qilish natijasida davolash samaradorligi ortadi, bemorlar hayot sifati yaxshilanadi, nojoʻya taʼsirlarning qisqarishi hisobiga bemorlar nogironligi kamayadi.

Shuningdek, deputat markazning ayollar kasalligi va Mamalogiya boʻlimiga tashrif buyurib, bugungi kunda xotin-qizlar salomatligini saqlash yoʻlida salmoqli ishlar amalga oshirilayotganligiga guvoh boʻldi.

Shuningdek, deputatimiz jarayonda markaz shifokorlari va fuqarolarimizga Davlatimiz rahbarining Oliy Majlisga va xalqimizga yoʻllagan Murojaatnomasi, undagi sogʻliqni saqlash tizimidagi rejalashtirilgan ustuvor maqsadlar yuzasidan atroflicha maʼlumotlar berdi.

Zuhra Quddusova,

“Adolat” SDP Samarqand tuman kengashi raisi.