Ayollarga ehtirom — buyuklik ramzi

Oʻzbekiston “Adolat” SDP Qashqadaryo viloyat Kengashi tadbirgohida 8-mart — “Xalqaro xotin-qizlar kuni” bayrami munosabati bilan “Ayolni eʼzozlang” mavzusida madaniy-maʼrifiy tadbir tashkil etildi. Unda partiyaning Ayollar Kengashi safida faol ish olib borayotgan, partiya gʻoyalarini xalq oʻrtasida keng targʻib etayotgan “Adolat”chi ayollar qatnashdi.

Ayol zoti timsolida buyuklik, goʻzallik va nafosat, ezgulik, mehr oqibat va fidoiylik kabi oliyjanob insoniy fazilatlarni koʻramiz, — dedi xalq deputatlari Qashqadaryo viloyat Kengashi deputati Ruiddin Raupov. — Ayol haqiqatdan ham borliq koʻzgusi. Uning nafis va bokira goʻzalligi olamni charogʻon etadi, chunki ayolning niyati pok, oʻzi ham pok. Hammamizga maʼlumki, munis va moʻtabar onalarni, ayol zotini eʼzozlash el-yurtimiz, xalqimiz uchun azal-azaldan ezgu qadriyat boʻlib kelgan. Biz taʼlim-tarbiyani, mehr-muhabbat va odamiylikning ilk saboqlarini aziz onalarimizdan, ularning beshigimiz uzra parvona boʻlib aytgan alla ohanglaridan olamiz. Shuning uchun ham biz hayotimiz mazmuni boʻlgan sevgi muhabbat va sadoqat , mehr-oqibat, nazokat va latofat kabi eng nozik, sirli tuygʻularni Yaratganimizning beqiyos moʻjizasi boʻlmish ayol zotisiz aslo tasavvur eta olmaymiz.

Bugun muhtarama opa-singillarimizni har qancha eʼzozlasak arziydi, — dedi xalq deputatlari Koʻkdala tuman Kengashi deputati, partiya tuman Kengashi raisi Venera Xusainova. — Ayol deganda koʻz oldimizga eng avvalo, munis va moʻtabar onamiz, qadrli va sevimli buvijonlarimiz,opa-singillarimiz keladi. Ularga qancha eʼtibor, mehr oqibat gʻamxoʻrlik qilsak, koʻngillarini shod aylab quvontirishga urinsak bari bir ozdir. Chunki, mana shu ayollar xonadonlarda yangidan-yangi chaqaloq yigʻisi eshitilishiga sabab boʻlayotgan zotlardir. Muqaddas islom dinimizda ham aziz va mukarram zot onaga yaxshilik qilish borasida juda koʻp manbalar va onani dilini ogʻritmaslik haqida koʻpgina qaytariqlar keltirib oʻtilgan.

Bayram tadbirida soʻzga chiqqanlar mamlakatimizda Prezidentimiz tomonidan xotin-qizlarga yaratilayotgan shart-sharoitlar, ularning haq-huquqlari va hurmatini joyiga qoʻyish borasida amalga oshirilayotgan ibratli ishlar xususida toʻxtaldilar. Vatanimizda yashayotgan ayollarga ishlashi uchun barcha shart-sharoitlar mavjuddir. Xotin-qizlarning jamiyat hayotidagi roli va taʼsirini kuchaytirish, ularning huquqiy bilimi, ijtimoiy, iqtisodiy va maʼnaviy manfaatlarini himoya qilishga qaratilgan 80 dan ortiq milliy va xalqaro hujjatlar qabul qilinganini alohida qayd etish lozim. Bunday gʻamxoʻrlikdan ruhlangan opa-singillarimiz Vatan ravnaqi uchun yanada koʻproq oʻz hissalarini qoʻshishga va mana shu muqaddas zaminni, undagi musaffo osmonni asrashga harakat qilmoqdalar. Yangi Oʻzbekistonda ayollarimiz barcha sohalarda erkin ishlash imkoniyatiga egadirlar. Maorif, sanoat, siyosiy-ijtimoiy, tadbirkorlik va fermerlik sohasi boʻlsin barchasida ayollarimiz mehnat qilish huquqiga egadirlar. Umuman aytganda, bizning yurt — ayollar qadr topgan yurt desak, mubolagʻa boʻlmaydi.

Tadbir soʻnggida faoliyatida va jamoat ishlarida har tomonlama namuna koʻrsatib kelayotgan ilgʻor “Adolat”chi ayollar partiyaning viloyat Kengashi va hamkor tashkilotlar tomonidan ragʻbatlantirildi.

Nodir Isomov,
partiya faoli.