Ayollarni zoʻravonlikdan asrang!

Har yili 25-noyabrʼdunyoning koʻplab davlatlarida ayollarga nisbatan zoʻravonlikka barham berish kuni sifatida nishonlanadi. Fargʻona shahridagi Oziq-ovqat texnologiyasi va muhandisligi xalqaro institutida xotin-qizlarga nisbatan zoʻravonlikka barham berish Xalqaro kuni munosabati bilan “Biz zoʻravonlikka qarshimiz!” mavzusidagi targʻibot tadbiri tashkil etildi.

Tadbirda institut Xotin-qizlar maslahat kengashi raisi Nigora Sobirova, Ijtimoiy himoya milliy agentligi tasarrufidagi ayollarni reabilitatsiya qilish va moslashtirish respublika markazi Fargʻona viloyat hududiy boʻlimi direktori Jamilaxon Ahmedova, Fargʻona shahar IIOFMB JXX XPB voyaga yetmaganlar masalalari boʻyicha inspektor, psixolog, kapitan Mehrixon Murotovalar ishtirok etdilar. Ayol millat davomchisi va tarbiyachisi sanalsa-da, unga qaratilgan zoʻravonliklar afsuski davom etayotgani achinarli xol, -deydi Ijtimoiy himoya milliy agentligi tasarrufidagi ayollarni reabilitatsiya qilish va moslashtirish respublika markazi Fargʻona viloyat hududiy boʻlimi direktori Jamilaxon Ahmedova. – Ayrim hollarda xotin-qizlarga boʻlayotgan zoʻravonliklarni koʻrib, yoqa ushlaysan. Jannat onalar oyogʻi ostida, -deya ayolni qadrlab kelgan ajdodlarimizning bugungi izdoshlaridagi qahr-u gʻazab va nafrat tuygʻulari oilalarni parokanda qilishga, ayollarning huquqlarini poymol qilishga, oilada kamol topayotgan farzandlarni tirik etim boʻlib qolishlariga olib kelyapti, xolos.

Amnesty Internatsional tashkiloti maʼlumotlariga koʻra, Oʻzbekiston oiladagi zoʻravonlikni qonunga alohida jinoyat sifatida kiritgan beshinchi davlatdir. Xalqaro tashkilotning Markaziy Osiyo boʻyicha tadqiqotchisi Xeza MakGillga koʻra, Oʻzbekiston hukumati inson huquqlari boʻyicha gender zoʻravonlikka barham berish boʻyicha xalqaro majburiyatini bajarish yoʻlida muhim qadam tashlamoqda. Biroq, jismoniy zoʻravonlik endi jinoyat hisoblansa-da, iqtisodiy va ruhiy zoʻravonliklar eʼtiborsiz qolishidan xavotirda.

Haqiqatdan ham, bugungi kunda oiladagi zoʻravonlik va ayollarga nisbatan tazyiq jiddiy muammo boʻlib qolmoqda. Oʻzbekistonda 2021-2022-yillarda huquqni muhofaza qiluvchi organlarga ayollar va qizlarga nisbatan tazyiq va zoʻravonlik holatlari yuzasidan 72 mingdan ziyod murojaat kelib tushgan boʻlib, ularning 61 mingdan koʻpi yoki qariyb 85 foizi oilada sodir etilgan.

Hamkor tashkilotlar bilan bugun biz oilaviy munosabatlarda muammolari boʻlgan oilalar bilan koʻproq ishlashimizga, ularga ruhiy-maʼnaviy koʻmak berishimizga toʻgʻri kelyapti. Ijtimoiy himoyaga muhtoj va kam taʼminlangan, ayniqsa qishloq joylaridagi oilalarda xotin-qizlarni ish bilan taʼminlash, munosib mehnat sharoitini yaratish va ularni qoʻllab-quvvatlash borasidagi ishlarning samaradorligini oshirish orqali oʻzini oʻzi band qilishiga erishilmoqda.

Jamiyatda xotin-qizlarga nisbatan turli koʻrinishlardagi tazyiq va zoʻravonlik holatlarining oldi olinib, salbiy qarashlarga barham berilsagina ayollarimiz chin maʼnoda baxtga, oilalarda totuvlikka erishadi.

Tadbir davomida tadbir ishtirokchilarini qiziqtirgan savolar yuzasidan bahs –munozaralar boʻlib oʻtdi.

"Adolat" SDP 

Farg'ona viloyat kengashi Matbuot hizmati.