Ayrim vazirliklarning 30 foiz vakolatlari mahalla darajasiga tushiriladi

“O‘zbekiston – 2030” strategiyasi

“Obod qishloq” va “Obod mahalla” dasturlari doirasida qishloq va mahallalarda infratuzilma bilan bog‘liq eng dolzarb masalalarni tizimli hal etish, xususan, joylarda ichki yo‘llar, ichimlik suvi, elektr energiyasi va gaz ta’minoti, ta’lim, sog‘liqni saqlash, madaniyat, sport va boshqa infratuzilma ob’ektlarini yaxshilash, shu asosda aholi uchun munosib turmush sharoitlarini yaratish masalalariga alohida e’tibor qaratib kelinmoqda.

Jumladan, 2022-2026 yillarga mo‘ljallangan Yangi O‘zbekistonning Taraqqiyot strategiyasi doirasida fuqarolarga barcha turdagi davlat xizmatlarini mahallaning o‘zida ko‘rsatish, mahalladan turib davlat idoralariga murojaat yo‘llash tizimini yo‘lga qo‘yish borasidagi ishlar ham boshlab yuborilgan edi.

Ayni kunlarda keng jamoatchilik muhokamasi uchun e’lon qilingan “O‘zbekiston – 2030” strategiyasi loyihasining to‘rtinchi, Qonun ustuvorligini ta’minlash, xalq xizmatidagi davlat boshqaruvini tashkil etish yo‘nalishida ham xalq xizmatidagi davlat tashkil etish va jamoatchilik boshqaruvini takomillashtirish bo‘yicha islohotlarni davom ettirish belgilangan.

Jumladan, aholi farovonligini ta’minlash va hududlarda kundalik masalalarni hal etishda mahalla instituti jamoatchilik hamda davlat organlari o‘rtasidagi “tayanch ko‘prik”ka aylantiriladi. Shuningdek, aholi tashabbusi bilan infratuzilmani yaxshilashga ajratiladigan mablag‘lar hajmi 24 trillion so‘mga yetkaziladi.

Mahallaning mablag‘larini aholining ovoziga ko‘ra, mahallalardagi infratuzilma loyihalariga yo‘naltirish amaliyoti joriy qilinib, mahallalarni muammolarini hal etish uchun ajratiladigan mablag‘lar miqdori kamida 3 barobarga ko‘paytiriladi. Mahallalarda 100 dan ortiq davlat xizmatlarini “bir qadam”da ko‘rsatish yo‘lga qo‘yiladi.

Yuqorida ta’kidlaganimizdek, davlat xizmatlarini mahalladan turib ko‘rsatish ko‘lamini kengaytirish maqsadida Iqtisodiyot va moliya vazirligi, Soliq qo‘mitasi, Kambag‘allikni qisqartirish va bandlik vazirligi kabi davlat organlarining kamida 30 foiz vakolatlari strategiyani amalga oshirish doirasida mahalla darajasiga tushiriladi.

Shu o‘rinda aytib o‘tish kerakki, mahalliy darajadagi muammolarni hal etishda mahalliy Kengashlardagi xalq vakillari bo‘lgan deputatlarning ham o‘rni muhim sanaladi. Shu bois, kelgusi yetti yilda hokimlarning mahalliy Kengashga rahbarlik qilish amaliyoti to‘liq bekor qilinib, Kengash raisining huquqiy maqomi, asosiy vazifa va funksiyalari hamda javobgarlik doirasi aniq belgilab qo‘yiladi.

Shu bilan birga, mahalliy Kengashlar faoliyatida jamoatchilik ishtiroki uchun zarur sharoitlar yaratilib, ushbu jarayonlarga fuqarolik jamiyati institutlarini keng jalb qilish choralari ko‘rilib, ularning faoliyati bosqichma-bosqich raqamlashtiriladi. Shuningdek, hududdagi aholi sonidan kelib chiqib har bir mahalliy Kengashda 5 tagacha doimiy asosda faoliyat yurituvchi professional deputatlar faoliyati yo‘lga qo‘yiladi.

Viloyat va tuman (shahar) darajasidagi hokimliklar vazifa va funksiyalarining aniq chegarasi belgilanib, mahalliy ijro hokimiyati organlarini demokratik tamoyillar asosida shakllantirish, shu jumladan, hokimlarni saylash tizimini joriy etish va ularni muddatidan oldin lavozimidan ozod etishning huquqiy asoslari ham yaratiladi.

Umuman olganda, kelgusi yetti yilda xalqchil davlat boshqaruvini yanada takomillashtirish, fuqarolarga ko‘rsatilayotgan davlat xizmatlari ko‘lamini oshirish borasida boshlangan ishlar yangi bosqichga olib chiqiladi.

Mahfirat XUSHVAQTOVA, 
Oliy Majlis Qonunchilik palatasi deputati.