Barcha islohotlar yangi hayot uchun xizmat qiladi

Erkin va farovon hayot kechirish insoniyatning eng ezgu orzularidan biri hisoblanadi. Haqiqatdan ham oʻz erki, haq –huquqi uchun kurashdan tolmagan xalqqina maqsad muddaosiga erishadi. Mustaqillikka erishgach esa uni saqlab qolish, ichki va tashqi xurujlardan himoya qilish birlamchi vazifaga aylanadi.

Istiqlol yillarida jamiyat hayotida, odamlarning turmush tarzi va ong-shuurida ulkan oʻzgarishlar yuz berdi. Fuqarolarimizning huquqiy madaniyati va ijtimoiy faolligi muttasil oshib bordi. Yangilangan Qomusimiz esa mamlakatimizda demokratik taraqqiyot yoʻlini tanlanishida, erkin bozor iqtisodiyotini shakllantirishda, inson uning qonuniy manfaatlari, huquq va erkinliklari, oʻz isteʼdodini toʻla namoyon etish va mehnati natijalaridan bahramand boʻlish oliy qadriyat hisoblanadigan fuqarolik jamiyatini barpo etish hamda uni yuksaltirishda mustahkam kafolat boʻladi.

Shu sabab ham bugun har bir yurtdoshimiz xonadonida yaxshi kun, toʻyu tantana hukm surmoqda. Kundan kunga yaqinlashib kelayotgan barchamiz uchun muqaddas sanalgan mustaqillik ayyomi ham barchamizni birday quvontirmoqda. “Yangi hayot uchun, yangi Oʻzbekiston uchun” shiori ostida nishonlanayotgan ayyom Vatan taqdirini oʻz baxti, deb bilgan har birimiz uchun qadrlidir.

Toʻyga toʻyona bilan degan naqlga amal qilgan holda, tuman Kengashiga partiyamizdan saylangan deputatlarimiz va partiya faollari bayram arafasida tumanimizdagi ijtimoiy himoyaga muhtoj oilalarning turmush darajasini oshirishga qaratilgan chora –tadbirlarni davom ettirib, ushbu toifa vakillarining yashash farovonligini oshirishga erishmoqda.

Bugun mamlakatimizda amalga oshirilayotgan har bir islohot “Inson qadri uchun” tamoyilini bajarishga xizmat qilmoqda. Hamyurtlarimiz ijtimoiy, siyosiy va huquqiy tashabbuslardan oqilona foydalanishni kundalik hayotiga tatbiq etib samarali natijalarga erishayotgani mamlakatimizda odilona siyosatning olib borilayotganini koʻrsatmoqda.

Biz partiya faollari Yangi Oʻzbekistonning faol fuqarosi va partiya yetakchisi sifatida xalq bilan birga boʻlib har bir xonadonga kirib borib, xalqimizning moddiy va maʼnaviy koʻmakka muhtoj fuqarolarning orzu va maqsadlarini amalga oshirishda kamarbasta boʻlishni yanada jadallashtirishga bel bogʻladik.

                                                                                        Mehrinoz Abdiyazova,

“Adolat” SDP Shovot tuman Kengashi raisi.