Barcha islohotlar yangi O’zbekiston uchun!

Mamlakatimizda 1991 yil 31 avgustidan boshlab har yili 1 sentyabr Oʻzbekiston Respublikasi davlat mustaqilligi kuni sifatida tantana qilinadi. Joriy yilda davlatimiz suvereniteti oʻttiz ikki yilligi keng nishonlanadi.

Shu munosabat bilan joriy yilning 27 iyul kuni “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni oʻtkazish toʻgʻrisida”gi Prezident Qarori eʼlon qilindi.

Аhamiyatlisi, bu yil oʻtadigan bayram tantanalari mamlakatimiz uchun tarixiy, siyosiy voqeliklar boy boʻlganligidir. Xususan, yangilangan Konstitutsiyamizning qabul qilinishi el-yurtimiz Yangi Oʻzbekistonni barpo etishga qaratilgan islohotlarni har tomonlama qoʻllab-quvvatlab kelayotganini yana bir bor yaqqol tasdiqladi.

Yangilangan Konstitutsiyamiz oʻzining mazmun-mohiyati bilan xalqimizni orzu umidlarini roʻyobga chiqarishda dasturulamal boʻlib xizmat qilishiga ishonamiz.

Fikrimga yaqinda muhokama qoʻyilgan “Oʻzbekiston – 2030” strategiyasining asosiy ustuvor yoʻnalishlari doirasida belgilangan tub islohotlar buning yorqin tasdigʻidir.

“Oʻzbekiston – 2030” strategiyasi mamlakatimizni yaqin 7 yilda rivojlantirishning ustuvor yoʻnalishlarini belgilab beruvchi asosiy hujjat sifatida belgilangan.

Unda mamlakat taraqqiyotining beshta asosiy yoʻnalishini qamrab oluvchi 100 ta maqsad shakllantirilgan boʻlib, barcha manfaatdor tomonlar uchun qulay va ochiq shaklda taqdim etilgan. Mazkur hujjatdagi birinchi yoʻnalishi “Har bir insonga oʻz salohiyatini roʻyobga chiqarishi uchun munosib sharoitlarni yaratish” deb nomlangan. Ushbu yoʻnalishdagi birinchi maqsad Maktabgacha taʼlim tizimini yangi bosqichga olib chiqish hamda bolalarning toʻliq qamrovini taʼminlashni koʻzda tutadi. Bolalarni maktabgacha taʼlim va tayyorlov guruhlari bilan qamrov darajasini 100 foizga yetkazish maqsad qilingan.

Umuman olganda “Oʻzbekiston – 2030” strategiyasi orqali taʼlimni barcha jabhalarini izchil rivojlantirish uchun aniq vazifalar belgilangan. Shu bois komil ishonch bilan aytish mumkinki mamlakatimizda Yangi Oʻzbekistonni, Uchinchi Renessans poydevorini munosib huquqiy va amaliy zamin yaratilmoqda.

Bu esa Prezidentimiz tomonidan amalga oshirilayotgan tub islohotlarning “Har bir kun – bu imkoniyat, har bir kun – bu kelajak uchun poydevor” degan hayotiy shiorning mohiyati va ahamiyatini xalqimiz chuqur anglab yetishiga xizmat qilishi shubhasizdir.

Zero, mustaqil taraqqiyot yoʻlidagi keng koʻlamli islohotlarimizni maqsadi barcha soha va tarmoqlar rivojini yangi bosqichga olib chiqish, bugungi kunda yurtimizda millati, tili va dinidan qatʼi nazar, har bir fuqaro erkin va farovon yashaydigan yangi jamiyat va davlat barpo etishdir.

Prezidentimiz Shavkat Mirziyoyevning Qarori bilan “Yangi hayot uchun, yangi Oʻzbekiston uchun” shiori ostida oʻtishi kutilayotgan mustaqilligimizning 32 yilligi tantanalari arafasidagi koʻtarinki kayfiyat, biz pedagoglar Yangi Oʻzbekistonni, Uchinchi Renessans gʻoyalarini hayotga tatbiq etish, yosh avlodni shunga munosib tarbiyalash muqaddas burchimiz boʻlib qoladi.

Dilorom Shamsieva,

Xalq deputatlari Navoiy viloyat Kengashi deputati,

Navoiy davlat pedagogika instituti chet tillar fakulteti dekani.