Barcha islohotlar yurt ravnaqi uchun

Qashqadaryo viloyatining xalq xoʻjaligi tarmoqlari mustaqillik yillarida gurkirab rivojlandi. Bugun mamlakatimiz viloyatlari orasida vohaning oʻrni nihoyatda katta. Ayniqsa, yer osti va yer usti boyliklari bilan respublikamizda yetakchi oʻrinda turadi. Viloyat ayni paytda mamlakatimizda qazib olinadigan tabiiy gazning 88 foizi, neftning 92 foizi, kondensatning 99 foizi, oltingugurtning 100 foizini beryapti. Shuningdek, viloyatimiz qishloq xoʻjaligi mahsulotlarini yetishtirish boʻyicha ham yuqori oʻrinda turadi.

Davlatga don, paxta sotishda voha dehqonlari peshqadamlikni qoʻldan bermay kelishyapti. Keyingi yillarda Prezidentimiz rahnamoligida tabiiy gaz, kondensat va qishloq xoʻjaligi mahsulotlarini qayta ishlovchi tarmoqlar ancha rivojlandi. Vohamizda shu kecha kunduzda 1,1 ming kichik korxona, 40,6 ming mikrofirma bor. 2023- 2025 yillarga moʻljallangan investitsiya dasturi doirasida joriy yilda viloyatimizda umumiy qiymati 300 million AQSH dollaridan ortiq 30 ga yaqin yirik ishlab chiqarish obyekti va quvvati ishga tushiriladi. Hozir viloyatimiz ana shunday ulkan bunyodkorlik maydoniga aylangan.

Amalga oshirilayotgan shu kabi ulkan islohotlar, bunyodkorlik va obodonlashtirish ishlarining borishi bilan har tomonlama yaqindan tanishish maqsadida Prezidentimiz koʻhna Qashqadaryoga tashrif buyurdilar. Bu yerda ayni paytda 3,5 millionga yaqin aholi umrguzaronlik qiladi. Prezidentimiz odamlarning yashash tarzi bilan qiziqdilar. Sanoat, qurilish, transport sohalarida erishilayotgan yutuqlarni koʻzdan kechirdilar. Xalq bilan ochiqdan-ochiq muloqotga kirishdilar.

Tashrif davomida Davlatimiz rahbari mahallalar hayoti, taʼlim muassasalari va sanoat korxonalari faoliyatini koʻzdan kechirdilar.

Prezident tashrifini Qarshi tumanidagi Yangi Batosh mahallasidan boshladi. Bu 2021 yilda tashkil topgan mahalla boʻlgani bois, bu yerda maktab yoʻq edi. Mahalladagi 500 dan ortiq oʻgʻil-qiz 10 kilometr masofadagi maktabga qatnardi. Prezidentimiz yangi qurilgan maktab binosini koʻzdan kechirdi. Har tomonlama zamonaviy uslubda barpo etilgan taʼlim maskanidan oʻgʻil-qizlarimizning sifatli taʼlim olishlari uchun barcha shart- sharoitlar yaratilgan. Prezidentimiz shu yerda ota-onalar, oʻqituvchilar bilan samimiy muloqot qildi. Shunday qulay sharoitlarda kamol topayotgan oʻgʻil-qizlarimiz kelgusida Vatanimiz ravnaqiga ulkan hissa qoʻshajagini alohida eʼtirof etdi.

Maktab 660 oʻrinli. Oʻttizdan ortiq sinfxonalar, kutubxona, faollar zali, oshxona, STEM laboratoriyasi, kompyuter xonasi va kasbga yoʻnaltirish xonalari mavjud. Ochiq va yopiq sport maydonchalari, yoʻl harakati xavfsizligi yoʻlaklari tashkil etilgan.

Prezident shu yerda qashqadaryolik oʻqituvchilar bilan suhbatlashdi. “Shunday sharoit yaratyapmizki, oʻquvchilar maktabdan chet tillarini va hunar oʻrganib chiqadi. 11-sinf hayot yoʻli sinfi boʻladi. Agar har bir yosh shunday oʻqib, jamiyatda oʻz oʻrnini topsa, Oʻzbekistonimizga mustahkam zamin boʻladi”, — dedi Shavkat Mirziyoyev. -“Har bir islohotda, qaror qabul qilishda oʻqituvchilar koʻz oldimda boʻladi. Sir emas, ilgari bolalar uch oylab paxtaga chiqarilardi. Birgina Qashqadaryoda 155 ming oʻquvchi oʻrni yetishmasdi. Buning uchun viloyatga 1 trillion mablagʻ ajratildi. 215 ta maktab qurildi. Bugun Qashqadaryo maktablar soni boʻyicha respublikada birinchi oʻrinda. Oʻqituvchilarning oylik maoshlari ham oshirildi. Albatta, bularni yana davom ettiramiz. Lekin asosiysi – sifat boʻlishi kerak. Bu avvalo, oʻqituvchilarning bilimiga, dunyoqarashiga, fidoyiligiga bogʻliq”, — dedi Davlat rahbari.

Uchrashuvda Oʻzbekiston Qahramoni, xalq deputatlari Qashqadaryo viloyat Kengashi deputati Muhabbat Sharopova viloyatdagi oʻqituvchilarning fidoiyligi haqida toʻlqinlanib gapirdi, suhbat davomida Davlatimiz rahbari oʻz fikr va takliflarini bildirdi.

Prezident Qarshi tumanidagi Yangi Batosh mahallasiga tashrif chogʻida kasanachilik markazi faoliyati bilan tanishdi.

Tashrif doirasida Prezidentimiz Qarshi oliy harbiy aviatsiya bilim yurtiga bordi. Qarshi oliy harbiy aviatsiya bilim yurti oshxonasida ofitser va kursantlar bilan tushlik ustida suhbatlashdi.

Ruiddin Raupov,
Oʻzbekiston “Adolat” SDP
Qashqadaryo viloyat Kengashi raisi.