Ta'lim sifati va samaradorligini oshirish - bosh maqsadimiz

Yangi Oʻzbekiston kelajagi, xalqimizning istiqboldagi farovon hayoti barcha sohalar va loyihalar muvaffaqiyati bilimli insonlarga bogʻliq. Shu bois ham mamlakatimizda Prezidentimiz rahnamoligida taʼlim sifatini yaxshilash, oʻqituvchilar mavqeyini yuksaltirish borasida koʻplab ijobiy ishlar qilinmoqda.

Bugun mamlakatimiz yangi davrga qadam qoʻymoqda. Yangi Oʻzbekistonning 2022-2026 yillarga moʻljallangan taraqqiyot strategiyasida toʻrtinchi ustuvor yoʻnalish taʼlim sohasini rivojlantirishga qaratilgani ham bejiz emas. Davlatimiz rahbari alohida eʼtirof etganlaridek, taʼlimdagi islohotlarni kechiktirishga haqqimiz yoʻq. Haqiqatdan ham maktab taʼlimida poydevorni bugundan mustahkam qoʻyish talab etiladi.

Davlatimiz rahbari har bir yigʻilishida qayta-qayta taʼkidlaganidek, maktab taʼlimi boʻyicha ilgʻor davlatlar tajribasini oʻrganish, xususan Finlyandiya taʼlim tizimining oʻziga xos xususiyatlari hamda muvaffaqiyatlarini oʻrganish, taʼlim sifatini oshirish, maktablarda oʻquv yuklamasi va darslar sonini qayta koʻrib chiqish, oʻquvchilarni faqatgina yodlashga emas, balki fikrlashga chorlaydigan metodika yaratish boʻyicha aniq vazifalar belgilab bergan edi. Taʼkidlash joizki, Taʼlim inspeksiyasi tomonidan barcha taʼlim vazirliklari bilan hamkorlikda ishlab chiqilgan “Uzluksiz taʼlim” konsepsiyalari loyihasida koʻplab mamlakatlar qatorida Finlyandiya tajribasidan ham foydalanish maqsad qilib olingan.

Shu kecha-kunduzda respublikamizdagi barcha maktablarni yaxshilash, isloh qilish keng jamoatchilikning vazifasi boʻlishi kerak. Prezidentimiz ham Murojaatnomada taʼlimga doimiy eʼtibor qaratilishini alohida taʼkidladilar. Shuningdek, oʻqituvchilarning obroʻsi va maqomini, ularning shaʼni va qadr-qimmatini himoya qilishni asosiy qomusimiz hisoblanmish Konstitutsiyada alohida belgilash, joriy yilda qoʻshimcha 70 ta yangi maktablarni qurish, 460 tasini kengaytirish, xususiy investitsiyalar ishtirokida 100 ta maktab qurish loyihasini boshlab, keyingi besh yilda ularning sonini 1000 taga yetkazish zarur. Bundan tashqari, 700 dan ortiq kasb-hunar maktabi, kollej va texnikumlar imkoniyatidan samarali foydalanish maqsadida amaldagi yildan boshlab yangi dastur standartlarini joriy etishni taʼkidlab oʻtdilar.

Bugun Oʻzbekiston “Adolat” SDP Qashqadaryo viloyat Kengashi tomonidan Qarshi shahridagi informatika va axborot texnologiyalariga ixtisoslashtirilgan 42-tayanch maktabning tadbirgohida boʻlib oʻtgan tadbirda ham shular xususida soʻz yuritildi. Unda maktab oʻqituvchilari, partiya faollari, oliy taʼlim masʼullari, keng jamoatchilik va ommaviy axborot vositalari vakillari qatnashdi.

Maktabning bugungi kundagi nufuzini oshirish boʻyicha chuqur bilim va salohiyatga ega boʻlgan oʻqituvchilar taʼlim dargohida faoliyat yuritmoqdalar. Partiya faollari va deputatlar maktabda taʼlim olayotgan iqtidorli oʻquvchilarning ishlari bilan yaqindan tanishdilar. Shunday ustozlardan biri Farida Umarova oliy toifali informatika fani oʻqituvchisi hozirgi kunga qadar taʼlim – tarbiya berayotgan oʻquvchilar nafaqat viloyatda balki butun respublikada ham yuqori natijalarni qoʻlga kiritmoqdalar. Ustozning shogirdlari 6-V sinf oʻquvchisi Asilbek Jamolov Blender dasturida maktabning 3D formatdagi maketini yaratgan, 7-V sinf oʻquvchisi Urolbek Abduraxmonov “Ardiuno” dasturida sfetafor kodini terib, jonli sfetafor yasagan, 10-A sinf oʻquvchisi Jumanazarov Javohir esa Qarshi shahrida oʻtkazilgan fan olimpiadasida informatika fanidan 2-oʻrinni, onlayn tarzda oʻtkazilgan Respublika fan olimpiadasida matematika fani boʻyicha faxrli 1-oʻrinni egallagan.

Tadbirda xalq taʼlimi fidoiysi maktabning oliy toifali tarbiya va huquqshunoslik fani oʻqituvchisi Mavluda Djoʻrayevna maktabda fin taʼlimi tizimi va metodlari asosida fanlar oʻqitilishi samaradorligi haqida maʼruza qildi.

- Finlyandiya taʼlim sohasida yuqori natijalarga erishgan davlatlar sirasiga kiradi. Tadqiqotchilar finlar erishgan muvaffaqiyat omillarini uch guruhga ajratadi: oʻqituvchilar salohiyati, taʼlim sohasidagi davlat siyosati va fin madaniyati,- dedi maktabning oliy toifali tarbiya va huquqshunoslik fani oʻqituvchisi Mavluda Djoʻrayevna .- Finlyandiya taʼlim tizimi negizi “Har qanday oʻquvchi yuqori natijaga erishishi mumkin, har qanday maktab u qayerda joylashganidan qatʼiy nazar sifatli taʼlim berishi kerak” degan tamoyilga asoslanadi. Asosiy eʼtibor taʼlim jarayonida iqtidorli oʻquvchilarga emas, balki oʻzlashtirishda orqada qolayotgan oʻquvchilarga qaratiladi. Bizning maktabimizda ham bugungi kunda fin taʼlim tizimidagi metodlarni dars jarayonida keng qoʻllash ishlari samarali davom etmoqda.

Partiya viloyat Kengashi bosh mutaxassisi Dilrabo Choriyeva viloyatda maktab taʼlimini rivojlantirish, taʼlim muassasalaridagi bugungi ahvol va sifatli taʼlimga qanday erishish yoʻllari xususida fikr mulohaza yuritdi.

Tadbir qizg'in savol-javoblarga boy boʻldi.

Faxriddin Yoʻldoshev,
Qarshi shahridagi informatika va
axborot texnologiyalariga
ixtisoslashtirilgan 42-tayanch
maktabi oʻquv ishlari boʻyicha
direktor oʻrinbosari, partiya faoli