Barchasi xalqimiz farovonligi uchun

Men bir partiya faoli sifatida Prezidentimizning Oliy Majlis va xalqimizga yoʻllagan Murojaatnomasida ilgari surilgan vazifalar bekam-u koʻst amalga oshirilsa, Yangi Oʻzbekiston yaqin kelajakda rivojlangan davlatlar qatoriga chiqishiga ishonaman. Murojaatnomada mamlakatimizni ijtimoiy-iqtisodiy rivojlantirishning 6 ta ustuvor yoʻnalishi belgilab berildi. Ushbu yoʻnalishlarda belgilangan vazifalar ijrosiga allaqachon kirishildi. Daʼvatda ixcham va samarali davlat boshqaruv tizimiga oʻtish lozimligi, Oʻzbekistonni ijtimoiy davlat tamoyili asosida qurish haqida davlatimiz rahbari oʻz fikrlarini keng bayon qildilar. Shuningdek, mamlakatda qonun ustuvorligini taʼminlash, inson huquq va erkinliklarini ishonchli himoya qilish davlatning konstitutsiyaviy majburiyati ekanligi koʻrsatib oʻtildi.

Maʼlumki, XXI asrda dunyo miqyosida tabiat va ekologiya borasidagi muammolar barchani tashvishga solib qoʻydi. Ekologiya masalasi global muammoga aylanib ulgurdi. Birgina Oʻzbekistonda ham bu borada aholiga tahdid sola boshlagan jumboqlardan eng dahshatlisi Orol fojiasidir. Shuning uchun ham Prezidentimiz ekologiya, ayniqsa, suv masalalari global muammoga aylanib borayotganini alohida taʼkidlab oʻtdilar.

Har qanday davlat rivojida tadbirkorlikning oʻrni katta. Shunday ekan bu soha rivojiga yetarlicha mablagʻ ajratib, faoliyat yuritayotgan fuqarolarga imkoniyat va imtiyozlar yaratilsa shubhasiz, taraqqiyot taʼminlanadi. Shu tufayli ham Prezidentimiz vodiy viloyatlariga safarlari chogʻida bu sohaga alohida eʼtibor qaratdilar. Namangan viloyatidagi Pop tumani meva-sabzavotchilik klasterida amalga oshirilayotgan ishlar bilan tanishdilar. Shu yerda Kosonsoy, Chortoq, Yangiqoʻrgʻon tumanlarini bogʻdorchilikka yoʻnaltirish borasida qimmatli maslahatlarni berdilar.

Darvoqe, Prezidentimiz oʻtgan yillarda Qashqadaryo viloyatiga tashriflari chogʻida ham Kitob, Shahrisabz, Yakkabogʻ tumanlarini bogʻdorchilik, sabzavotchilik va polizchilikka yoʻnaltirish yuzasidan aniq-tiniq koʻrsatmalar bergan edilar. Shunga asosan oʻtgan vaqt ichida ishlar tashkil etilib, bu uchala tumanda ham xalq farovonligi, dasturxonlarimiz moʻl koʻlligini taʼminlash uchun mustahkam zamin yaratildi. Hali Namangan viloyatida ham Prezidentimizning qimmatli maslahatlariga amal qilinib yuqori samaradorlikka erishilishi tayin.

Shu kecha kunduzda hamma hududlarda issiqxonalar tashkil etish va uni koʻpaytirishga alohida eʼtibor qaratish kerak. Hurmatli Prezidentimizning yuritayotgan oqilona siyosatlari tufayli bu soha ham jadal rivojlanyapti. Negaki, issiqxonalar qancha koʻp boʻlsa maʼmurchilik shuncha yaxshi boʻladi. Prezidentimiz Chortoq tumanida boʻlganlarida mingta issiqxonani oʻz ichiga olgan loyiha bilan yaqindan tanishdilar. Har biri ikki sotixli issiqxonalar bittadan oilalarga berilgan. Prezidentimiz issiqxonalarni yanada rivojlantirish uchun ishbilarmonlarga davlat tomonidan subsidiya ajratish, texnika, zarur oʻgʻitdan yordam koʻrsatish xususida yoʻllanmalar berdilar.

Aholi bandligini taʼminlash bugungi kunda eng asosiy ustuvor yoʻnalishlardan biriga aylangan. Ayniqsa, yoshlar va xotin-qizlarni bandligini taʼminlash borasida ham bir talay ishlar amalga oshirildi. Jumladan, Pop va Chust tumanlarida jun yetishtirish va qayta ishlash klasterini tuzish orqali Prezidentimiz tashabbuslari bilan 440 ta ish oʻrni yaratiladi.

Men davlatimiz rahbarining vodiy viloyatlariga tashriflari tufayli juda koʻplab xayrli ishlar yoʻlga qoʻyilganini guvohi boʻldim. Bu saʼy-harakatlar istiqbolda albatta,  yaxshi samara berishiga ishonaman. Tashrif viloyatlarning iqtisodiy-ijtimoiy rivojlanishiga katta turtki boʻlishi, shubhasiz.

Ruiddin Raupov,
xalq deputatlari Qashqadaryo viloyat Kengashi deputati.