Bayram arafasida birqancha partiya faollari taqdirlandi

Sir emaski, mamlakatimizda fuqarolik jamiyatini qurish jarayonida siyosiy partiyalar faoliyatiga yuksak eʼtibor qaratilib, ularning rivoji uchun qator imkoniyatlar yaratilmoqda.

Oʻzbekiston “Adolat” sotsial-demokratik partiyasi 1995-yil 18-fevralda tashkil etilgan boʻlib, jamiyatda ijtimoiy siyosatni amalga oshirish va qonun ustuvorligini taʼminlash maqsadida fuqarolarimizning siyosiy faolligini yuksaltirish yoʻlida salmoqli hissa qoʻshib kelayotgan siyosiy kuch hisoblanadi.

Joriy yil Oʻzbekiston “Adolat” SDPning tashkil etilganligiga 28 yil toʻldi. Mazkur sana munosabati bilan partiyaning Qoraqalpogʻiston Respublikasi Kengashi tomonidan tantanali bayram tadbiri tashkil etildi.

Unda partiyaning Qoraqalpogʻiston Respublikasi Joʻqorgʻi Kengesi hamda mahalliy Kengash deputatlari, partiyaning shahar va tuman Kengashi raislari, ayollar va yoshlar qanoti faollari hamda OAVlar vakillari ishtirok etishdi.

Tadbirni partiyaning Qoraqalpogʻiston Respublikasi Kengashi raisi N.Qaipbergenov kirish soʻzi bilan ochib, mamlakatimizda fuqarolik jamiyatini qurish yoʻlida amalga oshirilayotgan keng koʻlamli islohotlarda Oʻzbekiston “Adolat” SDPning ishtirokini alohida taʼkidlab, partiyaning dasturiy vazifalarini amalga oshirishda sidqidildan xizmat qilayotgan barcha darajadagi deputatlar, partiya faollarining saʼy-harakatlarini mamnuniyat bilan eʼtirof etdi. Shuningdek, jarayonda barcha “Adolat”chilarni bayram bilan samimiy tabrikladi.

Shundan soʻng Qoraqalpogʻiston Respublikasi Joʻqorgʻi Kengesidagi partiya fraksiyasi rahbari D.Qurbaniyazov soʻzga chiqib, partiya fraksiyasi misolida dasturiy vazifalarning ijrosini taʼminlash va hayotga tatbiq etish orqali xalq bilan bevosita muloqotlar oʻrnatishning yangicha yondashuvlari joriy etilganligini va oʻz oʻrnida fuqarolarning muammolarini hal etishda “Inson qadri uchun” tamoyili asosida birqancha ishlar amalga oshirilayotganligini taʼkidladi.

Soʻngra partiya Qoraqalpogʻiston Respublikasi “Ayollar qanoti” Kengashi raisi U.Seytjanova ham oʻz fikr-mulohazalarni bildirib, oʻtgan davr mobaynida jamiyatimizda ayollarning huquqiy-siyosiy salohiyatini yuzaga chiqarish orqali xotin-qizlarning oʻrni va mavqeyi har tomonlama mustahkamlab borilayotganligini alohida eʼtirof etdi.

Tadbir davomida partiyaning Qoraqalpogʻiston Respublikasi Kengashi raisi N.Qaipbergenov partiyaning maqsad va vazifalarini amalga oshirishda faollik koʻrsatgan birqancha deputatlar, shahar va tuman Kengashi raislari, ayollar va yoshlar qanoti aʼzolariga Oʻzbekiston “Adolat” SDP Siyosiy Kengashi raisi Abduhalimov Bahrom Abdurahimovich tomonidan taqdim etilgan tashakkurnomalar va esdalik sovgʻalarini topshirdi.

Oʻz oʻrnida Xalq deputatlari Сhimboy tumani Kengashi deputati F.Palvanova va partiya yoshlar qanoti aʼzosi, “Adolat” koʻkrak nishoni sohibi I.Ayimbetovlar ham soʻzga chiqib, bugungi bildirilgan ishonch bizga yanada partiyaning maqsad va vazifalarini amalga oshirishda katta masʼuliyat yuklashini taʼkidlashdi.

Tadbir koʻtaringki kayfiyatda, koʻy-qoʻshiqlar bilan davom etdi.

Oʻzbekiston “Adolat” SDP
Qoraqalpogʻiston Respublikasi Kengashi
Matbuot xizmati