Bemor bolalarga hayot beramiz

1-iyun – Xalqaro bolalarni himoya qilish kuni sifatida butun dunyo boʻylab keng nishonlanadi. “Adolat” SDP tashabbusi bilan ayni shu kuni anʼanaviy ravishda oʻtkazilayotgan begʻaraz donorlik aksiyasi partiya aʼzolari, xayrixohlar va koʻngilli yurtdoshlarimizni xayrli ishga boshlamoqda. Bugun ertalabdan andijonlik “adolatchilar” ham ana shunday ezgu maqsad bilan Andijon shahridagi Andijon viloyat qon quyish markaziga kirib keldilar. Maqsad bemor bolalarga hayot bagʻishlash. Bolalarning begonasi boʻlmaydi, deydilar. Har bir ota-ona farzandining sogʻlom boʻlishi, hech kimdan kam boʻlmasligini xohlaydi. Agar salomatligida ozgina muammo boʻlsa dunyo koʻziga qorongʻi koʻrinadi. Shunday vaqtda barcha birdek bolani sogʻlomlashtirish uchun koʻmak berishga oshiqadi. “Adolatchilar”ning donorlikka qadam qoʻyishi buning yorqin ifodasidir.

“Bor mehrimiz senga, bolajon!” shiori ostidagi aksiya qatnashchilari bu yil avvalgi yillardagidan koʻpaygan. Ular orasida “Yosh adolatchilar”-Andijon davlat tibbiyot instituti talablari koʻpchilikni tashkil etadi.

Madaminjon Madazimov, “Adolat” SDP Andijon viloyat kengashi raisi:

  — Xalqimiz insonparvarlik va mehr-oqibat tuygʻularini hamma narsadan ustun qoʻyadi. Donorlik bu borada katta ahamiyatga ega. Bemor bolalarni sogʻlom hayotga qaytarishning oʻzi boʻlmaydi. Qon bu – hayot, inson tirikligining asosi. Uning qiymatini hech bir narsa bilan oʻlchab boʻlmaydi. Bugungi aksiya ishtirokchilari bemor bolalarning salomatligi tiklanishiga hissa qoʻshishni oʻzlarining insoniylik burchi, deb biladilar.

Aslida biz bolalarning birgina kulgisi uchun borini berishga tayyor xalqimiz.

Partiya tashabbusi bilan tashkil etilgan aksiya davom etmoqda.

“Adolat” SDP

Andijon viloyat kengashi Matbuot xizmati.