Bildirilgan ishonchga munosib boʻlish yoʻlida

Deputatlik – bu xalqning ishonchi. Ishonch esa — bu Yaratganning insonga bergan ilohiy neʼmatlari ichida eng zalvorlisidir. Chunki, uni yelkasida tutgan inson bildirilgan ishonchni oqlash yoʻlida shifo istagan koʻngillarga malham, yoʻl izlaganlarga yoʻl, bir qirgʻoqda turganlar uchun ikkinchi qirgʻoqqa beminnat eltuvchi qayiq, bezovta qalblar uchun halovat ulasha oluvchi boʻlishi lozim.

Albatta, bugun har soniyada zamon rivoji shiddat bilan borayotgan, har sohada taraqqiy etish, har sohada oʻsish kuzatilayotgan bir vaqtda deputatlar faol va zamon bilan hamnafas boʻlishi kerakligini davrning oʻzi koʻrsatib turibdi. Deputatlari-chi? Bu borada zamon bilan birga dadil qadam tashlay olyaptimi? Ularning faoliyatidan xalq rozi boʻlyaptimi? Bir soʻz bilan aytganda xalqning ishonchi oqlamayaptimi?

Yuqoridagi savollarga javob izlab Xalq deputatlari Samarqand viloyat Kengashiga “Adolat” SDPdan saylangan deputat Tozagul Xoliqovaning faoliyatiga nazar tashladik.

Deputat oʻz faoliyati davomida saylov okrugi hududidagi kam taʼminlangan ijtimoiy himoyaga muhtoj, oilalar holidan muntazam ravishda xabar olib turadi. Hududdagi “Temir daftar”, “Ayollar daftari”, va “Yoshlar daftar”larida roʻyxatda turgan oilalarni qoʻllab-quvvatlash borasida olib borilayotgan ishlar yuzasidan jamoatchilik nazoratini olib bormoqda. Oʻtgan 2022-yil davomida deputat tashabbusi va koʻmagi bilan murojaatlar asosida 20 dan ortiq fuqaroga tibbiy hamda moddiy koʻmak koʻrsatildi. Yaqinda deputat T.Xoliqova saylov okrugi hududida saylovchilar bilan boʻlib oʻtgan uchrashuvda asosiy eʼtibor Oʻzbekiston Respublikasi Prezidenti Shavkat Mirziyoyevning Oliy majlisga hamda Xalqimizga yoʻllagan Murojaatnomasi mazmun-mohiyatiga qaratildi. Tadbirdan soʻng faolimiz nogironligi boʻlgan xonadonlarda boʻlib, ularning holidan xabar oldi, murojaatlar oʻrganildi.

Jarayonda Ishtixon tuman “Yangikent” mahalla fuqarolar yigʻinida yashovchi buyrak yetishmovchiligidan aziyat koʻrgan fuqaro O.Nazarovning ham holidan xabar olindi. Deputat tibbiyot sohasi vakili boʻlgani uchun ham fuqaroning murojaatini tinglab, unga tibbiy tekshiruvdan oʻtishda, zarur dori vositalari bilan taʼminlanishida koʻmak berdi.

Deputat eng avvalo, saylov okrugi hududidagi mahallalar kesimida hal etilishi zarur boʻlgan muammolar roʻyxatini shakllantirishga eʼtibor qaratdi. Unga koʻra “Mohlar” va “Bogʻbon” mahalla fuqarolar yigʻini hududidagi ichki yoʻllar taʼmirga muhtojligi, “Zarbuloq” mahalla fuqarolar yigʻinidagi simyogʻochlar eskirib foydalanish uchun yaroqsiz holatga kelib qolganligi, baʼzilari kishilar hayotiga xavf soladigan holatda foydalanishga yaroqsiz boʻlib qolganligi, aholining bandligini taʼminlash masalalari hududning asosiy muammolaridan hisoblanadi.

Albatta, xalq bilan ochiq muloqot qilish, fuqarolarning dard-u quvonchiga sherik boʻlishda gap koʻp. Chunki odamlar bilan yaqindan muloqotda boʻlmasdan turib, faqat qogʻozlarda qayd etilgan maʼlumotlar bilan joylarda kechayotgan ijtimoiy-iqtisodiy jarayonlarga, mavjud muammolarga, keng jamoatchilik oʻy-fikrlariga, eng muhimi, aholi kayfiyatiga baho berib boʻlmaydi. Saylov okrugimdagi fuqarolar bilan uchrashuvlardan kelib chiqib aytishim mumkin-ki, hududda hali yechimini kutayotgan muammolar bor va bu muammolarni hal etish uchun ish olib boryapmiz. Bu borada oldimizda turgan ustuvor vazifa eng avvalo, hududda tadbirkorlikni rivojlantirish, tadbirkorlik bilan shugʻullanish istagida boʻlgan xotin-qizlar, yoshlarga koʻmaklashish, “Temir daftar”, “Ayollar daftari” va “Yoshlar daftari”ga kiritilgan fuqarolarning bir ishning boshini tutib, kasb-hunari orqasidan oʻz oʻrnini topib ketishlariga koʻmaklashishdan iborat. – deydi partiyamizdan Xalq deputatlari Viloyat Kengashiga saylangan Tozagul Xoliqova. – Joylardagi muammolarni oʻsha hududdan saylangan deputatlar boshqalarga qaraganda yaxshiroq biladi. Ammo, deputat oʻz vakolati doirasida mutasaddilarga kiritgan soʻrovlari har doim ham oʻz yechimini topavermaydi, soʻrovlarga shunchaki nomigagina javob qaytarayotgan mutasaddilar ham yoʻq emas.

Darhaqiqat, xalqning ishonchli vakili boʻlishning ham oʻziga xos masʼuliyati va majburiyati bor. Ularni vijdonan bajargan deputatlargina xalq eʼzoziga va hurmatiga sazovor boʻlishadi. Bu esa siyosiy partiya ilgari surayotgan gʻoyalarga keng jamoatchilikda xayrixohlikni oshirish va hayotga tatbiq etish koʻp jihatdan partiyaning Kengashlaridagi deputatlari zimmasiga katta masʼuliyat yuklaydi hamda oʻz faoliyatlarining samaradorligi ortishida katta xizmat qiladi.

Tozagul Xoliqova ham partiyaning Ishtixon tuman Kengashidagi deputatlik guruhi bilan hamkorlikda partiyaning dasturiy gʻoyalari, elektorat manfaatlaridan kelib chiqib, boshqaruv idoralari oldiga dolzarb masalalarni qoʻyish, mavjud muammolarga yechim topish yoʻlida qator oʻrganishlar olib bordi. Xususan, umumtaʼlim maktablari oshxonalarida, maktab atrofida oʻquvchilar salomatligi uchun zararli boʻlgan fast-fud, tez tayyor boʻladigan oziq ovqatlar, energetik ichimliklar, tamaki mahsulotlari savdosini oldini olish, maktablar hududida tezlikning cheklanganlik belgilari oʻrnatilganligini nazorat qilish masalalari yuzasidan umumtaʼlim maktablarida oʻrganishlar oʻtkazildi. Oʻrganish natijalari yuzasidan umumlashtirilgan maʼlumotlar mahalliy kengashdagi doimiy komissiyalar va sessiya kun tartibiga kiritish rejalashtirilgan.

Partiyaning yoshlar bandligini taʼminlash maqsadida amalga oshirayotgan faoliyatiga hamohang ravishda deputat Tozagul Xoliqova tomonidan tumandagi 3 nafar yoshlarning bandligini taʼminlashga erishildi. Taʼkidlash joizki, deputatlar joylarda mavjud masalalarni oʻrganishda yanada faol ishlashga, zimmasidagi masʼuliyatni, davr oldiga qoʻyayotgan yangidan-yangi vazifalarni uddalashga, bildirilgan ishonchni oqlashga harakat qilmoqda. Binobarin vaqt oqar daryo, u bizni kutib turmaydi, uning sarhisobi esa faoliyatimiz natijasi, aniq bahosini aks ettiradi.

Akbar Erkayev,
Oʻzbekiston “Adolat” SDP Samarqand viloyat Kengashi ijrochi kotibi