“Bir adolatchi-yuz ayolga himoyachi”

“Adolat” sotsial-demokratik partiyasining “Bir adolatchi yuz ayolga himoyachi” loyihasi doirasida xotin-qizlarni ijtimoiy-huquqiy jihatdan qoʻllab-quvvatlash, ularning oila va jamiyatdagi mavqeyini mustahkamlashga qaratilgan keng koʻlamli ishlar amalga oshirilmoqda.
Bu boradagi saʼy-harakatlar partiyaning Shofirkon tumani Kengashi tomonidan ham tizimli yoʻlga qoʻyilgan.
Tumandagi “Qalmaqon” mahallasida xalq deputatlari Shofirkon tumani Kengashi deputati Zulfiya Ashurova tomonidan partiyaning “Ayollar qanoti” raisi Hamrogul Ashurova, mazkur mahalla faollari bilan birgalikda xotin-qizlarning muammolarini oʻrganishga qaratilgan sayyor qabul tashkil qilindi. Unda ushbu hududda istiqomat qilayotgan “Ayollar daftari” roʻyxatidagi bir guruh xotin-qizlar bilan suhbat olib borildi. Muammolari oʻrganildi. Ochiq muloqot jarayonida xotin-qizlar tomonidan kelib tushgan oʻnga yaqin murojaat boʻyicha huquqiy va psixologik maslahat berildi.

Faollar loyiha doirasida xotin-qizlarning huquqiy manfaatlarini har tomonlama himoya qilish, ish bilan taʼminlash, mehnat va oʻqish sharoitlarini yaxshilash maqsadida tumandagi “Qalmaqon” MFY da istiqomat qiluvchi fuqaro Nozima Inoyatovaning xonadonida boʻlishdi. Maʼlum boʻlishicha fuqaro 5 oy oldin 2 nafar voyaga yetmagan farzandi bilan otasining uyiga arazlab kelgan, mahalla faollari oilani bir necha bor yarashtirishga urinishgan va natija boʻlmagan. Shundan soʻng, partiya faollari “Qoʻrgʻoni Vardonze” MFY da yashovchi turmush oʻrtogʻi Feruz Akmalov bilan suhbatlashib, tushuntirish ishlarini olib borishdi. Faollarning saʼy-harakatlari zoye ketmadi va yosh oila yarashtirildi.

Shuningdek, mazkur mahallada istiqomat qiluvchi 4-bosqich “Ayollar daftari” ning 3.1 va 4.1 toifalarda roʻyxatda turuvchi xotin-qizlar xonadonlarini taʼminlash uchun mahalla xodimlari va moliya boʻlimi xodimi bilan oʻrganish ishlari olib borildi.
Bundan tashqari nogironligi boʻlgan va oʻzgalar parvarishiga muhtoj xotin-qizlarga davolanishi uchun saxovatpesha homiylar bilan hamkorlikda moddiy yordam toʻlab berilishi belgilandi. Yana uch nafar ayolga kundalik ehtiyojlari uchun kerakli oziq-ovqat mahsulotlari tarqatildi.

MohigulRahimqulova,
“Adolat” SDP Buxoro viloyat Kengashi matbuot kotibi.