“Biz korrupsiyaga qarshimiz”

Aholi ongida korrupsiyaga nisbatan toqatsizlik dunyoqarashini shakllantirish, ularning huquqiy madaniyatini oshirib borish dolzarb ahamiyatga ega. Buning uchun eng avvalo fuqarolarimizning ongiga bu illatning qanday ayanchli oqibatlarga olib kelishi haqida tushuntirishlar berib borish lozim. Oliy taʼlim muassasalarida, shuningdek, tibbiyot muassasalarida korrupsiya balosiga mutlaqo yoʻl qoʻyib boʻlmasligi, bu illatni tag-tomiri bilan yoʻqotish uchun tushuntirish va tarbiyaviy ishlarni, huquqiy bilimlarni yetkazib borishimiz kerak.

Shu kabi ishlarni amalga oshirish maqsadida “Adolat” SDP Shofirkon tuman Kengashi tomonidan tumanda joylashgan “Akademik Toʻra Mirzayev nomidagi axborot-kutubxona markazida” partiyaning “Biz Korrupsiyaga qarshimiz” loyihasi doirasida davra suhbati tashkil etildi.

Uchrashuvda Shofirkon tuman Kengashi raisi N.Berdiyeva, “Qalmaqon” MFY xotin-qizlar faoli, Xalq deputatlari tuman Kengashi deputati Z.Ashurova, “Oqila ayollar harakati” yetakchisi, “Buvijonlar maktabi” rahbar H.Ashurova hamda mazkur MFYning faol xotin-qizlari ishtirok etishdi.

Tadbirda soʻzga chiqqan partiya tuman Kengashi raisi N.Berdiyeva korrupsiya va unga qarshi kurash masalalari, korrupsiyaga nisbatan toqatsizlik madaniyatini shakllantirish toʻgʻrisida fikr-mulohazalar yuritdi. Adolatsizlik, qonunga hurmatsizlik, kasb-u amalga, ishonchga xiyonat qilib boʻlmasligini oʻqib-uqqan, poraxoʻrlik va korrupsiyaga, suiisteʼmolchilikka qarshi oʻzida immunitet hosil qilgan yoshlar kelajakda jurʼatli, vijdonli inson boʻlib yetishadi,- deydi partiyaning tuman Kengashi raisi.

Davra suhbatida davomida korrupsiya millatning kushandasi va qabul qilingan qonunlar haqida, pora bergan ham, pora olgan ham Oʻzbekiston Respublikasi “Jinoyat kodeksi”ning 211-moddasiga binoan jazolanishi; oʻz xizmat mavqedan foydalangan holda pora olgan shaxs esa 213-moddaga asosan jazolanishi toʻgʻrisida tuman Kengashi deputati Z.Ashurova ham maʼlumotlar berib oʻtdi.

Tadbir soʻngida ishtirokchilar oʻz fikr-mulohazalarini bildirishdi.

Mohigul Rahimqulova,

“Adolat” SDP Buxoro viloyat Kengashi matbuot kotibi.