Biz sogʻlom turmush tarzini tarafdorimiz

Har bir inson uchun salomatlikdan koʻra muhim narsaning oʻzi yoʻq. Shuning uchun kishilar xastaliklardan saqlanish, salomatliklarini asrash va mustahkamlash uchun kuch-gʻayrat, mablagʻ va vaqtni ayashmaydi. Bunda turli muolaja usullari, sport va badantarbiya mashqlaridan ham, Alloh yaratib qoʻygan turli shifobaxsh neʼmatlarni isteʼmol qilishdan ham, tez-tez shifokor va tabiblar qabulida boʻlib, ulardan maslahat va tavsiya olib turishdan ham erinishmaydi.

Bular bejizga emas, sababi hayot shirin, salomat umrguzaronlik qilish undan ham yaxshi. Baxtli-saodatli turmush kechirish uchun esa insonga avvalo sogʻlik kerakdir. “Adolat” SDP Paxtachi tuman Kengashi tashabbusi bilan, tumandagi Pedagogika kolleji oʻquvchilari ishtirokida “Salomatlik yoʻlida birlashaylik” loyihasi doirasida “Sogʻlom turmush tarzini tarafdorimiz hamda giyohvandlikka qarshimiz” mavzusida tadbir tashkil etildi.

Har bir ota-ona farzandini sogʻlom turmush tarzi asosida tarbiyalab voyaga yetkazishni istaydi. Shuningdek, har bir oilada sogʻlom farzand voyaga yetishi va sogʻlom tarbiya olishi boʻyicha ota-ona va mahalla faollari masʼuldir, oʻz hayotini toʻgʻri talqin etish, har xil koʻngilsizliklarni oldini olish, voyaga yetib kelayotgan yoshlarni giyohvandlikdan saqlash maqsadida oʻtkazilgan ushbu tadbirni Paxtachi Pedagogika kolleji direktor oʻrinbosari K.Raximov ochib berdi.

- Yoshlarni sogʻlom turmush tarzi asosida tarbiyalash va ularni giyohvandlikdan asrash barchamizning vazifamiz, deydi K.Raximov. -Ushbu mavzudagi targʻibot tadbiri oʻquvchilarda qiziqish uygʻotdi va ularni kelgusida aynan shu boradagi ongini yanada kengayishiga xizmat qildi desam, mubolagʻa boʻlmaydi.

Partiya faollari va sohaga masʼul xodimlar tomonidan barcha yigʻilish qatnashchilarga mavzu doirasida tegishli tushunchalar berib oʻtildi. Tadbir soʻngida faol yoshlar va ishtirokchilar esdalik sovgʻalari bilan taqdirlandilar.

Olim Jonxoʻrozov,
“Adolat” SDP Paxtachi tuman Kengashi raisi.