Biz yoshlar saylovlarda faol ishtirok etamiz

Oʻzbekiston “Adolat” sotsial demokratik partiyasi Markaziy Kengashi tomonidan Prezident sayloviga tayyorgarlik yuzasidan yoshlar ishtirokida zoom platformasi orqali konferensiya tashkil etildi. Online tashkil etilgan uchrashuv davomida “Adolat” sotsial demokratik partiyasi Samarqand viloyat Kengashi jamoasi, “Ayollar qanoti” faollari va biz yoshlar yaʼni partiya faollari ishtirok etdik!

Konferensiya avvalida mamlakatimizda demokratik talablar va xalqaro standartlarga mos saylov tizimi shakllantirilganligi, saylovlarga tayyorgarlik koʻrish va uni yuqori saviyada oʻtkazish, fuqarolar, jumladan, yoshlarning saylov huquqlarini toʻla amalga oshirishi uchun shart-sharoit yaratish borasidagi qonunchilik izchil takomillashtirilganligi yuzasidan kichik maʼruza qilindi.

Bugungi kunda biz yoshlar demokratik islohotlarni yanada chuqurlashtirish va fuqarolik jamiyatini rivojlantirishga qaratilgan keng koʻlamli islohotlarda faol qatnashmoqdamiz. Xususan mamlakatimiz hayotidagi muhim siyosiy voqeada ishtirok etishning masʼuliyatini chuqur his etmoqdamiz, – desam adashmagan boʻlaman.

Tashkillashtirilgan ushbu muloqotda Konstitutsiyamiz va saylov qonunchiligimizga doir bilimimizni yanada boyitdik. Bugungi tadbirda olgan bilimim boʻlajak saylovda faol fuqarolik pozitsiyamizni erkin namoyon etishga yordam beradi.

Qolaversa uchrashuv doirasida Prezident saylovida faol ishtirok etish har bir fuqaroning konstitutsiyaviy huquqi va burchi ekani, mamlakatimizda oʻz mustaqil fikri va hayotiy pozitsiyasiga tayangan holda munosib nomzodga ovoz berish qonun bilan kafolatlangani taʼkidlandi.

Umida Ergasheva,

“Adolat” SDP Samarqand shahar Kengashi “Yoshlar qanoti” raisi,

Samarqand viloyati Yuridik Texnikumi 2-bosqich talabasi.