Bizda yana hushhabar...

Usufjon Sharipovni Soʻxda tanimagan, uni hurmat qilmagan inson boʻlmasa kerak. Tuman elektr taʼminoti korxonasi faxriysi Usufjon aka qishni izgʻirinli kunlarini ham, yozning yuqori haroratini ham pisand qilmay, har kuni erta tongdan tuman markazidan 10 km uzoqlikda joylashgan Chashma qishlogʻidan kelib, xalqimiz xizmatiga bel bogʻlangan. 33 yillik mehnat faoliyati bilan qadr topgan Usufjon aka “Аdolat” SDP partiyasi ilk tashkil topgan davrlarda birinchilar safida aʼzolikka kirgan 28 yillik partiya faxriysi ham.

Kasbimga boʻlgan muhabbatim yoʻlimni uzoqligiga ham toʻsqinlik qila olmaydi, chunki har kuni belgilangan vaqtdan oldin korxonamga yetib kelib ӯz vazifamni bajaraman va hamkorlarim bilan xalq farovonligi hamda davlatimiz taraqqiyotiga hissa qoʻshayotganimdan bagʻoyat mamnunman, — deydi qahramonimiz.

Mazkur korxona va tuman “Аdolat” SDP oʻrtalarida oʻzaro hamkorlik mustahkamlanganligi bois partiya tomonidan ilgʻor va fidoiy kasb egasi Usufjon “Yoshlarni vatanparvarlik ruhida tarbiyalash” medaliga tavsiya etilgan edi. Аxir Usufjon yillar mobaynida yosh avlodni vatanparvarlik ruhida tarbiyalab, kasb-u korini oʻrgatib, yurt ravnaqi yoʻlida ular bilan fidokorona mehnat qilib kelmoqda.

“Yoshlarni vatanparvarlik ruhida tarbiyalash” medalini topshirish marosimida korxona rahbari Sh.Rahimov ,“Аdolat” SDP tuman kengashi raisi S.Domulloev, “Аdolat ” SDP Tuman kengashi deputati S.Nishonov va barcha korxona xodimlari ishtirok etib bu yuksak mukofot bilan Usufjonni tabriklab ezgu niyatlarini izhor etdilar.

“Adolat” SDP Fargona viloyat kengashi

Matbuot xizmati.