Boʻlajak filologlar bilan suhbat tashkil etildi

“Adolat” SDP Xorazm viloyati hamda Urganch shahar Kengashi hamkorligida Urganch davlat universiteti Filologiya fakultetida “Vatan ozodligi yoʻlida shahid ketganlar xotirasi mangu barhayotdir” mavzusida maʼnaviy-maʼrifiy tadbir tashkil etildi.Tadbirga partiya faollari, deputatlari hamda UrDU oʻqituvchi va talabalari ishtirok etishdi.Tadbir davomida ajdodlarning anʼanalarini davom ettirish, hozirgi kunlarning qadriga yetish, nafaqat bugungi kun, balki kelajak uchun ham gʻoyat muhim ekani, davlatimiz tomonidan “Shahidlar xotirasi” yodgorlik majmuasi, “Qatagʻon qurbonlari xotirasi” muzeyi tashkil etilgani toʻgʻrisida atroflicha tushunchalar berildi.

Shuningdek, mustaqilligimiz sharofati bilan mamlakatimizda amalga oshirilgan islohotlar, bunyodkorlik, ijtimoiy-iqtisodiy sohalardagi tub oʻzgarishlar ayniqsa, yoshlarga qaratilgan va berilayotgan imkoniyatlar, Yangi Oʻzbekistonimizning barpo etilayotgani, unda insonlar qadr –qiymati yanada mustahkamlanib borayotgani toʻgʻrisidagi fikr va mulohazalar talabalar diqqat markazidan joy oldi.

Iqtidorli talabalarning “Mustaqillik-oliy neʼmat”, “Ozod va obod Vatanim!” kabi sheʼrlari tadbirga koʻtarinkilik bagʻishladi. Fikr va mulohazalar, taklif va istaklar qizgʻin tus olgan tadbir soʻngida talabalar qiziqqan savollariga partiya faollari tomonidan atroflicha javoblar oldilar.

Bir guruh tadbir ishtirokchilari partiyaga aʼzo boʻlish istagini bildirdi va   faol qatnashgan talabalarga partiyaning esdalik sovgʻalari topshirildi. Vohada bu kabi tadbirlar izchillik bilan davom etadi.

                                                                                Zamira Abdullaeva,

         “Adolat” SDP Xorazm viloyat Kengashi matbuot kotibi.