Bogʻotlik   yangi deputatimiz faoliyatini yoʻllarni ravon etishdan boshladi  

“Adolat” SDP Bogʻot tuman Kengashi “30-Nayman” saylov okrugidan saylangan deputat Shermat Matchanov deputatlik faoliyatini boshlaganiga koʻp vaqt oʻtmay saylovchilar eʼtiboridan munosib joy olgani bilan quvonarli boʻlmoqda. U saylovchilari orasida boʻlib, ularning yashash tarzi hamda koʻpdan oʻylantirib kelayotgan muammolarini oʻrganib, bartaraf etish choralarini boshlab yubordi.

Deputat aralashuvi bilan saylovchilarni yillar boʻyi qiynab kelayotgan navbatdagi muammo ham ijobiy hal etilmoqda.

Xususan, “Nayman” mahallasidagi yoʻlning yaroqsiz holatga kelib qolganligi deputatning halovatini oʻgʻirlab, tinchlik bermasdan kelayotgan edi. Tegishli tashkilotlarga qilgan murojaati eʼtiborga olindi va yoʻlning 2 km uzunligiga “shpes” tosh yotqizish ishlari boshlab yuborildi.

Mahalla aholisining hamda yoʻlovchilarning quvonchi cheksiz. Endi chang toʻzon, yogʻingarchilikda ham bemalol manzilga keng va ravon yoʻllardan yurib boriladi. Bu qulayliklarga nima yetsin, deya mahalla nuroniylari shukronalik bilan duoga qoʻl ochishmoqda.

Tuman hokimligi, tuman yoʻllardan foydalanish unitar korxonasi va boshqa hamkor tashkilotlar bilan hamkorlikdagi bu xayrli ish, fuqarolarning yashash sharoitidan rozi boʻlib yashashlari orqali yurtimiz rivoji uchun muhim ahamiyat kasb etadi.

Deputatlik faoliyatini yangi boshlagan   deputatimizni saylovchilarining qadr-qimmati va shaʼni, farovon hayoti uchun bor kuch va gʻayratini safarbar etishiga ishonamiz va ulkan yutuqlar tilaymiz.                      

Saodat Masharipova,

“Adolat” SDP Bogʻot tuman

Kengashi “Ayollar qanoti” raisi.