Bola huquqlari — Davlat eʼtiborida hamisha

Dunyoning koʻplab mamlakatlari qatori mamlakatimizda ham bolalar huquqlarini himoya qilish davlat siyosatining asosiy yoʻnalishlaridan biridir. Negaki, bola huquqlarini himoya qilishdan maqsad – ulgʻayib kelayotgan yosh avlodning kelajakda maʼnan boy, jismonan sogʻlom va axloqan pok boʻlib voyaga yetkazishdir. Ularga koʻrsatilayotgan gʻamxoʻrlik esa yurt ravnaqi uchun qoʻyilayotgan mustahkam poydevordir. Shu bois keyingi yillarda yurtimizda bolalarni ijtimoiy, iqtisodiy va maʼnaviy jihatdan himoya qilish borasida keng koʻlamli ishlar amalga oshirilmoqda. Xususan, Oʻzbekiston Respublikasining Konstitutsiyasi, Oila kodeksi, Fuqarolik kodeksi, Mehnat va Jinoyat kodeksi hamda boshqa bir qator qonun hujjatlarida bolalar huquqlarini himoya qilishga oid normalar oʻz ifodasini topgan.

Mamlakatimizda onalik va bolalikni qoʻllab-quvvatlash, bolalarning maʼnaviy va jismoniy rivojlanishi uchun shart-sharoitlar yaratish hamda BMTning Bola huquqlari toʻgʻrisidagi konvensiyasi talablarini bajarish borasida keng koʻlamli ishlar olib borilmoqda. Bugungi kun talabi Oʻzbekistonda bolalar huquqlarini himoya qilish va qoʻllab-quvvatlash, ularning huquqiy holatini takomillashtirish tizimini qayta koʻrib chiqishni taqozo qilmoqda. Amaldagi qonunchilikda bola huquqlarini toʻla hajmda himoya qilishga imkon bermaydigan bir qator boʻshliqlar mavjud. Bolalarni himoya qilish boʻyicha islohotlarni kuchaytirish uchun ijtimoiy xizmat xodimlarini oʻqitish va qoʻllab-quvvatlash, ushbu tadbirlarni rejalashtirishning samarali usullaridan biri hisoblanadi.

Oilaviy muhitdan mahrum boʻlgan bolalarga xizmat koʻrsatish borasidagi ishlar, shuningdek nogironligi boʻlgan bolalar integratsiyasi hamda ijtimoiy va huquqiy xavf guruhlaridagi bolalar oʻrtasida huquqbuzarliklarning oldini olish masalalari ijtimoiy xizmat xodimlarining bugungi kunda asosiy vazifalaridan biri hisoblanadi.

Bugun mamlakatimizda yashab, baxtli bolalik davrini surayotgan, hayotning siz-u biz koʻrib kelayotgan past-balandliklaridan hali totib koʻrmagan har bir bola eʼtiborga, himoyaga loyiqdir. Oʻzbekiston Respublikasi Prezidenti Shavkat Mirziyoyev taʼkidlaganidek, “Biz uchun jamiyatda begona bola yoʻq va boʻlmasligi kerak. Hammasi oʻzimizning, Oʻzbekistonimizning bolalari. Vaqtida mehr koʻrsatsak, ishga, ilmga, kasbuhunarga, ezgu fazilatlarga oʻrgatsak, ularning yoʻlini ochib bersak, ertaga foydasi oʻzimizga, jamiyatimizga tegadi”.

Moxina Abdiraximova,

“Adolat”SDP viloyat Kengashi mutaxassisi.