Bolalar huquqlari qonun himoyasida

Davlatimiz rahbari boshchiligida boshlangan islohotlar koʻplab sohalar kabi bolalar huquqlari va qonuniy manfaatlari himoyasi sohasida tub oʻzgarishlarni boshlab berdi, yangilangan Bosh qomusimizda bola huquqlari kafolatlariga alohida eʼtibor qaratilgan.

Aynan shunday islohotlar ijrosida bolalarni zoʻravonlikning barcha turlaridan himoya qilish va Oʻzbekiston bolalari uchun xavfsizroq va yanada qulay muhitni yaratish ustuvor vazifalardan biridir. Bu yoʻldagi birinchi muhim qadam sifatida “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasining ishlab chiqilganligi yuksak ahamiyatga ega.

Oʻzbekiston “Adolat” SDP Qoraqalpogʻiston Respublikasi Kengashi tomonidan Nukus akademik litseyida ushbu qonun loyihasi muhokamasiga bagʻishlangan davra suhbati tashkil etildi.

Mazkur davra suhbatidan koʻzlangan maqsad ham “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasidagi asosiy masalalarni muhokama qilish va uni yanada takomillashtirish yuzasidan ustuvor yoʻnalishlarni belgilab olishdir.

Davra suhbatida Oʻzbekiston “Adolat” SDP Qoraqalpogʻiston Respublikasi Kengashi raisi oʻrinbosari Raoʻaj Otarbayev, Nukus shahar ishki ishlar boʻlimi masʼul xodimi, mayor Zebo Naoʻrqzbayevalar qonun loyihasi yuzasidan batafsil maʼlumotlar berdi.

  -Bugungi globallashuv davrida irodasi baquvvat, mustaqil dunyoqarashga ega, sogʻlom va har tomonlama barkamol avlodni shakllantirish oldimizda turgan muhim vazifalar hisoblanadi.

Taʼkidlash kerakki, bolalarning huquq va manfaatlariga jiddiy xavf solib kelayotgan ushbu muammolarni bartaraf etish maqsadida Adliya vazirligi va boshqa manfaatdor vazirlik va idoralar tomonidan “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasi ishlab chiqilgan.

Loyihani ishlab chiqishda Oʻzbekiston Respublikasi Prezidenti huzuridagi Ijtimoiy himoya milliy agentligi, Maktabgacha va maktab taʼlim vazirligi, Ichki ishlar vazirligi mutaxassislari, shuningdek, loyiha konsepsiyasini yaratishdan boshlab barcha jarayonlarda BMT Bolalar jamgʻarmasi (YUNISEF) ekspertlarining jalb qilingani muhim ahamiyat kasb etadi. Shuningdek, qonun loyihasini yaratishda xorijiy tajriba ham oʻrganilgan.

Jumladan, loyihada bolalarni zoʻravonlikdan himoya qilish sohasidagi davlat siyosatining asosiy ustuvor yoʻnalishlari bayon etilib, sohaga masʼul oʻndan ortiq vazirlik va idoralarning vakolatlari belgilab berilmoqda.