Bor boʻling yaxshilar

Insoniyat tarixidan barchamizga maʼlumki neʼmatlar ichida salomatlikning bahosi yoʻq.

Inson salomat boʻlmasa, na farogʻat va na hashamat tatiydi. Ayniqsa, bemor farzand boʻlsa-chi, bu dilbandi, yuragining bir parchasi uchun, uning birgina kulgisi uchun dunyolarni baxshida etishga tayyor boʻladi inson. Xalqimiz asl baxtni farzandlari salomatligi, baxt-u kamolida deb biladi. Lekin bu hayot. Uning turli sinovlari, oʻnqir-choʻnqirlari bor. Murgʻak vujudi xastalik bilan mardonavor kurashayotgan jajji bolajonlarga ozgina boʻlsa-da quvonch ulashish, ularning dillariga xushnudlik baxsh etish istagida Oʻzbekiston “Adolat” SDP Samarqand viloyat Kengashi hamda Xalq deputatlari Samarqand viloyat Kengashi deputati Inobat Boboqulova, Pastdargʻom tuman Kengashi deputati Quyosh Haqberdiyev, Payariq tuman Kengashi deputati Umar Omonov va Samarqand shahar Kengashi deputati Abdulla Yusupovlar tomonidan Samarqand viloyat koʻp tarmoqli markaziy shifoxonaning bolalar gematologiyasi boʻlimi hamda Respublika ixtisoslashtirilgan onkologiya va radiologiya ilmiy — amaliy tibbiyot markazi Samarqand viloyat filialida davolanayotgan bemor bolajonlar holidan xabar olib 1-iyun Xalqaro bolalarni himoya qilish kuni munosabati bilan bayram tadbiri tashkil etildi.

“Bor mehrimiz senga bolajon” shiori ostida tashkil etilgan tadbirda tashkilotchilar ushbu tibbiyot maskanlarida bemorlar uchun yaratilgan shart-sharoitlar bilan tanishib, shifokorlarning soha rivojiga xizmat qiladigan taklif va mulohazalarini tingladilar. Tadbirni kirish soʻzi bilan ochib bergan partiyaning viloyat Kengashi raisi M.Bababekova mamlakatimizda amalga oshirilayotgan islohotlar, jumladan, tibbiyot sohasiga qaratilgan va yaratilgan imkoniyatlarning negizida inson manfaatlari va qadr-qimmati mujassam ekani toʻgʻrisida gapirdi.

Har bir yaxshi fazilat insoniyatga beriladigan eng oliy neʼmatdir, mana shunday fazilatlarini ayniqsa bemor bolajonlarga bagʻishlaganda har bir kishining dili shodlanadi beixtiyor. Ushbu beminnat va begʻaraz yordamlari zamirida Samarqand viloyati boʻyicha 100 dan ortiq bolalar dillari quvonch va shodlikka toʻldi. Ushbu xursandchiliklarini koʻrgan bemor bolajonlarning ota-onalari saxovatpesha deputatlarimizni duolar qilib minnatdorchiliklar bildirishdi.

Deputatlarimizning ushbu xayrli ishlarning natijasi oʻlaroq qanchadan qancha bemorlarning dardlariga darmon boʻldi desak adashmagan boʻlamiz va kelgusida albatta bunday yaxshiliklarning bardavom boʻlishini tilab qolamiz!

 “Adolat” SDP

Samarqand viloyati Kengashi Matbuot xizmati.