“Bor mehrimiz senga, bolajon!”

Bugun 1-iyun “Xalqaro bolalarni himoya qilish kuni” munosabati bilan “Adolat” sotsial-demokratik partiyasi tomonidan donorlik aksiyasi amalga oshirildi. Bir necha yillardan buyon muntazam ravishda oʻtkazib kelinadigan  “Bor mehrimiz senga, bolajon!”loyihasi bilan ijtimoiy tarmoqlar orqali tanish boʻlgan boʻlsam-da, Respublika qon quyish markazi hamda “Adolat” SDP Markaziy apparati hamkorlikda otkazayotgan bu galgi tadbirda oflayn tarzda ilk bor ishtirok etdim. Tadbir doirasida kelib-ketuvchilarga boqib, xasta bolajonlar uchun qon berish istagida boʻlgan koʻngilli insonlar safi men oʻylaganimdan ham kengroq ekanligiga guvoh boʻldim. Bu holat meni juda quvontirdi.

Qon berish uchun kelgan har bitta shaxs avval mutaxassislar tomonidan tekshirildi va sogʻligʻida hech qanday muammosi boʻlmaganlardan belgilangan meʼyorda qon olindi. Har bir qon topshirgan shaxsga qon topshirilganidan song nimalar qilinishi, koʻproq qanday mahsulotlarni isteʼmol qilish lozimligi borasida qimmatli ma’lumotlar berildi. Shu bilan bir qatorda, beminnat donorlarga minnatdorchilik sifatida “Adolat”SDPning tashakkurnomalari va esdalik sovgʻalari taqdim etildi.

Bugungi tadbir davomida yordam qoʻlini choʻzish maqsadida kelganlar ichida bir nechta qon bosimi past boʻlgan insonlar qon bera olishmadi. Biroq qalbi daryo bu insonlarga partiya vakillari qon topshirgan boshqa insonlar qatori birdek minnatdorchilik bildirildi.Sovgʻalar ulashishdi.

Tadbir yana bir necha kun davom etishi koʻzda tutilgan. Mazkur aksiyada ishtirok etmoqchi boʻlgan koʻngillilarni Respublika qon quyish markazi va uning Respublikamizdagi hududiy boʻlimlariga lutfan taklif etamiz.

“Bor mehrimiz senga bolajon” loyihasi barchani xayrli ishlardan chetda qolmaslikka chaqiradi.

Saidahmadova Zulfizar Ibrohim qizi,

Òzbekiston davlat jahon tillari universiteti

 Media va kommunikatsiya fakulteti 2-bosqich talabasi

“Adolat” faoli.