Buxoroda parlament nazorati

Oʻzbekiston Respublikasi Prezidenti raisligida joriy yil 27 iyul kuni Fargʻona viloyatida oʻtkazilgan yigʻilishda belgilangan vazifalarning Buxoro viloyatida bajarilishi ustidan jamoatchilik va deputat nazoratini amalga oshiruvchi Oliy Majlis Qonunchilik palatasi ishchi guruhi faoliyatini tashkil etish boʻyicha seminar boʻlib oʻtdi.

Seminarda Oʻzbekiston Respublikasi Oliy Majlis Qonunchilik palatasi Spikeri Nuriddinjon Ismoilov, Oliy Majlis Qonunchilik palatasi Spikeri oʻrinbosari Aktam Haitov, quyi palataning bir qator deputatlari shuningdek, viloyat Kengashlari deputatlari ishtirok etishdi.

Unda mamlakatimiz rahbarining Buxorodagi tashrifi davomida belgilangan vazifalarning hayotda tatbiq etilishida Xalq deputatlari kengashlarining rolini oshirish hamda aholini qiynayotgan tizimli muammolarni aniqlash, ularni bartaraf etish boʻyicha masʼul tashkilotlarning hisobotini Xalq deputatlari viloyat, shahar tuman kengashlari sessiyalarida eshitish va mazkur yoʻnalishdagi qonunchilikni takomillashtirish boʻyicha takliflarni shakllantirishda ishchi guruh oldida turgan vazifalar muhokama qilindi.

Shunga koʻra, Buxoro shahri va Gʻijduvon tumanida iqtisodiy oʻsishini taʼminlash va tadbirkorlik faoliyatini rivojlantirish, aholini ish bilan taʼminlash, xotin-qizlar va yoshlar masalasi, energetika, oziq-ovqat xavfsizligi, zamonaviy texnologiyalarga asoslangan sanoatni rivojlantirish hamda mahallalarda farovon hayotni taʼminlash, kuz-qish mavsumiga tayyorgarlik, aholi farovonligini taʼminlashda mavjud salohiyatni ishga solish masalalari yuzasidan tegishli vazifalar belgilanib olindi.

Maqsud Homidov,

Xalq deputatlari Buxoro viloyat Kengashi deputati,

O’zbekiston “Adolat” SDP Buxoro viloyat Kengashi raisi.