Buyuk bobokalonlarimiz hamisha el ardogʻida

Buyuk mutafakkir bobmiz Abu Rayhon Beruniyning tavallud topganiga 1050-yil toʻlishi munosabati bilan Beruniy tumanida katta tadbir oʻtkazildi.

“Abu Rayhon Beruniy ilmiy merosining jahon fani rivojidagi oʻrni” mavzusidagi xalqaro ilmiy-amaliy konferensiyaga Turkiya, Hindiston, Eron, Ozarbayjon, Tojikiston, Pokiston, Qozogʻiston, Qirgʻiziston, Rossiya, Afgʻoniston va Xitoy davlatlaridan mehmonlar keldi. Tadbirda xurmatli mehmon sifatida Oʻzbekiston “Adolat” sotsial-demokratik partiyasi siyosiy Kengashi raisi, Oʻzbekiston Respublikasi Fanlar akademiyasi vitse-prezidenti Bahrom Abduhalimov ishtirok etdi.

Mehmonlarni Nukus xalqaro aeroportida Qoraqalpogʻiston Respublikasi Joʻqorgʻi Kengesi Raisining oʻrinbosari R.Saparbayev kutib oldi.Bundan soʻng konferensiya ishtirokchilari I.V.Saviskiy nomidagi Qoraqalpoq davlat sanʼat muzeyiga sayohat qildi.Kunning ikkinchi yarmida konferensiya ishtirokchilarini Beruniy tumanida Qoraqalpogʻiston Respublikasi Joʻqorgʻi Kengesi Raisi A.Orinbayev tantanali ravishda kutib oldi. Bu yerda bobomiz hurmatiga oʻrnatilgan byustiga gul chambarlari qoʻyilib, Abu Rayhon Beruniyning ramziy qabrini ziyorat qildilar va qurʼoni tilovatlar qilindi.

Shuningdek, Abu Rayhon Beruniyning bizga yetib kelgan adabiy meroslari, jahon ilmiga qoʻshgan hissasi haqida soʻz yuritildi.

Taʼkidlab oʻtish joizki, Abu Rayhon Beruniy oʻz zamonining koʻpgina fanlarini, jumladan, astronomiya, fizika, madaniyatshunoslik, geografiya, geologiya, etnologiya, tarix, til ilmi fanlarini yetuk egallagan va ushbu fanlarning rivojiga katta hissa qoʻshgan. Natijada buyuk allomaning nomi jahon ilm dunyosining buyuk mutafakkirlari qatoridan oʻrin oldi. Beruniy oʻz davri ilm-fanining turli sohalariga tegishli 160 dan ortiq asarlar yaratdi.

Bundan 10 asr avval yozib qoldirgan va tarix sahifalariga muhrlangan bu asarlar bugungi ilm-fanning muvaffaqiyatlarining asosini tashkil etmoqda.

Konferensiya ishtirokchilari Beruniy tumanidagi madaniyat saroyida boʻlib u yerda bobomizning boy meroslaridan soʻzlovchi kitoblar, tarjima qilingan asarlar, qator olimlar boʻyicha izlanishlar, shuningdek, tarix sahifalarini namoyon etadigan foto suratlar koʻrgazmasi bilan tanishdi.

Bir kun davomida boʻlib oʻtadigan ilimay-amaliy konferensiya Uygʻun avtorligidagi Abu Rayhon Beruniy tarixiy dramasining premyerasi, tuman Amfiteatridagi gala konserti bilan davom etmoqda.

“Adolat” SDP Qoraqalpogʻiston Respublikasi Kengashi matbuot kotibi.