Buyuk istiqlolga yuz tutgan Vatan

Yangi Oʻzbekistonning bugungi taraqqiyot darajasi, shon-u shuhratiga mos holda munosib kutib olish va yuksak saviyada nishonlash maqsadida davlatimiz rahbari tomonidan “Yangi hayot uchun — yangi Oʻzbekiston” degan bosh gʻoyani oʻzida mujassam etgan tashkiliy — amaliy, maʼnaviy-maʼrifiy tadbirlar hamda targʻibot-tashviqot ishlari dasturi tasdiqlandi. Dasturda nazarda tutilgan chora-tadbirlarning samarali bajarilishi, barcha hududlarda aholining keng qatlamlari oʻrtasida Mustaqillik bayramiga bagʻishlangan maʼnaviy-maʼrifiy anjumanlar, “Uch avlod uchrashuvi” tadbirlari, ochiq muloqot suhbatlar, adabiy kechalar, milliy kino kunlari, sayillar, madaniyat va sport tadbirlarini samarali oʻtkazish maqsadida atoqli ilm-fan namoyandalari, madaniyat va sanʼat arboblari, taniqli sportchilardan iborat targʻibot guruhlari tashkil etilib, ularning joylardagi uchrashuvlari hamyurtlarimiz qalbiga koʻtarinkilik bagʻishlamoqda.

Mamlakatimizda har yili Mustaqillik bayramini yurtdoshlarning talab va istaklari asosida, bugungi davr ruhiga hamohang tarzda nishonlash anʼanaga aylanib borayotgani Oʻzbekistonimizning istiqlolga yuz tutayotganing ifodasidir.

“Har bir kun- bu imkoniyat, har bir kun – bu kelajak uchun poydevor” degan hayotiy shiorning mohiyati va ahamiyati yurtimiz taraqqiyoti uchun muhim hisoblanadi, albatta.

Mamlakatimizda Sogʻliqni saqlash, ilm-fan, madaniyat va sanʼati, sport sohalarini rivojlantirish, nuroniylar, xotin-qizlar va yoshlarga doimiy eʼtibor va gʻamxoʻrlik koʻrsatish, oila, onalik va bolalikni himoya qilish va boshqa sohalar boʻyicha amalga oshirilayotgan ijtimoiy dasturlarga alohida eʼtibor qaratilayotgani negizida inson qadr-qimmati mujassam ekanini koʻramiz.

Bugun har bir yurtdoshimiz mana shu bunyodkorliklar, yaratuvchanliklarning tashabbuskoriga aylanmoqda, desak mubolagʻa emas. Chunki, bizning Vatanimiz buyuk istiqlolga yuz tutgan holda dadil odimlamoqda. Yangi Oʻzbekistonning har bir fuqarosi mana shu erkinlik nafasidan bahra olmoqda. Yurtdoshlarimiz dilida bu kunlarga shukronalik, ishonch tuygʻulari ortib bormoqda. Bir soʻz bilan aytganda, biz ozod va obod yurtda yaratilayotgan imkoniyatlardan keng koʻlamda foydalanib, yangi Oʻzbekistonimizning rivoji uchun barcha kuch va gʻayratimizni safarbar etamiz.

Nigora Jumaqova,

“Adolat” SDP Xonqa tuman Kengash raisi.