Davlat barqaror rivojlanishi uchun dadil qadam qoʻyilmoqda

Konstitutsiya loyihasidagi moddalar soni amaldagi 128 tadan 155 taga, normalar soni esa 275 tadan 434 taga koʻpaymoqda, yaʼni, Asosiy qonunimiz matni qariyb 65 foizga ortdi va xalqimiz takliflari asosida yangilandi.

Oliy Majlis Qonunchilik palatasi deputati Dilshod Hamzayevning Gʻuzor tumani aholisi bilan boʻlib oʻtgan samimiy va oshkora muloqotda shular xususida soʻz yuritildi. Deputat 1-, 16-, 50-, 38-, 75-, 22-maktablarda va sanoat yoʻnalishidagi texnikumda yangilanayotgan Konstitutsiyamizga kiritilayotgan oʻzgartirish va qoʻshimchalar xususida keng tushuntirishlar berdi. Mahalla faollari, taʼlim, tibbiyot, ishlab chiqarish, tadbirkorlar va keng jamoatchilik vakillari, ommaviy axborot vositalari xodimlari ishtirok etgan uchrashuvlarda deputat Konstitutsiyada Oʻzbekiston – suveren, demokratik, huquqiy va ijtimoiy davlat ekani qatʼiy belgilab qoʻyilganligi xususida tushuncha berdi. Bundan tashqari, deputat kuchli ijtimoiy himoya va muhtojlarga gʻamxoʻrlik – davlat siyosatining muhim yoʻnalishi boʻlib qolajagini eʼtirof etdi. Xususan, Konstitutsiyada har bir fuqaroning uy-joyli boʻlish huquqi belgilanganini alohida taʼkidladi.

- Ushbu normaning amal qilishi har bir Oʻzbekiston fuqarosi, jumladan, yosh oilalarning oʻz boshpanasiga ega boʻlishini taʼminlab, kishilarning hayotdan rozilik darajasini oshiradi,-dedi Dilshod Hamzayev. -Shuningdek, aholi kafolatlangan bepul tibbiy xizmatlardan foydalanishi ham loyihaga kiritilgan. Umuman, loyihada odamlar salomatligini asrash bilan bogʻliq normalar 4 barobar koʻpaytirilmoqda. Aholi hayoti va salomatlik darajasini yaxshilashning zaruriy sharti sifatida Konstitutsiyada atrof-muhitni muhofaza qilish boʻyicha kompleks choralar belgilanmoqda.

Uchrashuvda deputat istiqbolimiz egalari huquqlari himoyalanishi va ularning jamiyat va davlat hayotida faol ishtirokini ragʻbatlantirish kafolatlanayotganini tushuntirdi. Bundan tashqari, yoshlarning taʼlim olishi, barkamol oʻsib ulgʻayishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiyaviy majburiyati ekanligini alohida taʼkidladi.

Shodmon Eshboyev,
Oliy Majlis Qonunchilik palatasi deputati yordamchisi.