Davlat byudjetining ijro etilish ustidan jamoatchilik nazoratining oʻrnatilishi

Markaziy Osiyoda yagona oʻzini-oʻzi elektr energiyasi bilan taʼminlovchi, suyultirilgan sintetik mahsulotlar ishlab chiqaradigan “Uzbekistan GTL” zavodi ulkan majmuaning qurilishi keyingi yillarda sanoat rivojini yangi bosqichga olib chiqish boʻyicha amalga oshirayotgan siyosatimiz natijasidir. Ushbu zavod mamlakatimizda va umuman mintaqamizda neft-gaz-kimyo sanoati sohasidagi eng yirik korxonadir. Majmuada yiliga 3,6 milliard metr kub tabiiy gaz qayta ishlanib, qiymati 1 milliard dollardan ziyod boʻlgan 1,5 million tonna tayyor suyuq mahsulotlar ishlab chiqariladi. Jumladan, 307 ming tonna aviakerosin, 724 ming tonna dizel yoqilgʻisi, 437 ming tonna nafta, 53 ming tonna suyultirilgan gaz tayyorlanadi. Uzbekistan GTL” mahsulotlari esa jahondagi eng yuqori ekologik talablar va standartlarga toʻliq javob beradi. Bu yerda tayyorlanadigan sintetik yoqilgʻi anʼanaviy yoqilgʻilarga nisbatan 40 foiz kam chiqindi va zararli gaz hosil qiladi. Buning hisobidan, yiliga 13 ming 500 tonna zararli gazlarning havoga tarqalishiga yoʻl qoʻyilmaydi.Yangilanayotgan Konstitutsiyamizda mamlakatimiz iqtisodiy salohiyatini yanada rivojlanishiga ulkan hissa qoʻshayotgan majmualarda faoliyat yuritayotgan yosh mutaxassislar mehnatini qadrlash va ragʻbatlantirish masalalari ham eʼtibor qaratilgan.

 Bugun Oliy Majlis Qonunchilik palatasi deputati Abdugʻani Umirov, xalq deputatlari Nishon tumani Kengashi kotibiyat hamda Nishon tumani maʼnaviyat boʻlimi bilan hamkorlikda “Uzbekistan GTL” zavodi tadbirgohida “Davlat byudjetining ijro etilish ustidan jamoatchilik nazoratining oʻrnatilishi” mavzusida tadbir oʻtkazildi. Unda deputatlar, partiya faollari, zavod ishchi xodimlar, tuman hokimligi xodimlari ishtirok etdilar. Yangilanayotgan Konstitutsiyada inson manfaatlari xalq farovonligi yoʻlida davlat tomonidan olib borilayotgan islohotlar oʻzining moliyaviy taʼminotini talab etishi, bu eng avvalo, davlat byudjeti orqali amalga oshirilishi,ularning maqsadli sarflanishining taʼminlanishi, davlat byudjetini shakllantirish va ijro etish faoliyati ustidan nazorat amalga oshirib borilishi alohida moddalarda mustahkamlab qoʻyildi.

 -Yangi tahrirdagi Konstitutsiyamizga kiritilayotgan 148-moddaga koʻra, “ Fuqarolar va fuqarolik jamiyati institutlari Oʻzbekiston Respublikasi Davlat byudjetining shakllantirilishi hamda ijro etilishi ustidan jamoatchilik nazoratini amalga oshiradi.” Bu davlat hokimiyatining birdan-bir manbai xalq ekanligidan kelib chiqadi,-dedi Oliy Majlis Qonunchilik palatasi deputati Abdugʻani Umirov.-Shuningdek, barchamiz soliq toʻlovchimiz, oʻz soliqlarimizning qanday sarflanayotganini bilish, buni nazorat qilishga haqlimiz. Bugungi kunda mamlakatimizda rivojlanayotgan “Ochiq byudjet” davlat siyosati, byudjet ustidan jamoatchilik nazoratini samarali amalga oshirish va bu borada toʻliq axborot olish uchun keng imkoniyatlar yaratmoqda.Davlat byudjetidan maqsadli foydalanishni taʼminlash esa aholiga tibbiy xizmatlar koʻrsatish, taʼlim olish imkoniyatlarini kengaytirish, ijtimoiy himoyaga muhtoj aholi qatlamlariga zarur yordam koʻrsatish, uy-joy bilan taʼminlash. Davlat va jamiyat hayotining barcha sohalarida samaradorlikni taʼminlashga xizmat qiladi.Shuningdek, deputat Konstitutsiyaning jamiyatimiz rivojidagi ulkan ahamiyati, unda har birimizning huquq va erkinliklarimiz aks etganligi xususida ham soʻz yuritib, tadbir ishtirokchilarini 30-aprel kuni boʻlib oʻtadigan referendumda faol ishtirok etishga chaqirdi.

Nodir Isomov, 

deputat yordamchisi.